पोखरा ।
कास्कीको माछापुच्छ्रे गाउँपालिकाले गरेको पालिकाभित्रका पदमार्गमा पदयात्रा गर्न जाने पर्यटकसँग प्रवेश शुल्क उठाउने निर्णय विवादित बनेको छ । गाउँपालिकाले पर्यटकसँग शुल्क लिने निर्णय गरेसँगै पर्यटन व्यवसायी रुष्ट बनेका छन् । पर्यटनसँग सम्बन्धित संस्था ट्रेकिङ एजेन्सी एसोसियसन अफ नेपाल (टान) ले पनि निर्णयको विरोध गरेको हो ।

टान अध्यक्ष धर्मराज पन्थीले पालिकाको सूचनाले पर्यटन व्यवसायमा नकारात्मक सन्देश प्रवाह भएको बताए । ‘भर्खरै उदाउँदो पदमार्गमा पर्यटकसँग चर्को शुल्क लिने निर्णय पर्यटनमैत्री छँदै छैन । कोरोनाले शिथिल बनेको पर्यटन क्षेत्रमा पर्यटकलाई झण्झट थप्ने जुन निर्णय भयो, यसले पर्यटकको मुड चेन्ज भएको छ । अन्य गन्तव्यतर्फ मोडिएका छन्,’ अध्यक्ष पन्थीले भने । उनले दोहोरो शुल्क नलिन आग्रह गरे ।

एक्यापले सार्क देशका पर्यटकसँग १ हजार र तेस्रो देशका पर्यटकसँग ३ हजार रुपैयाँका दरले प्रवेश शुल्क लिन्छ । यसरी एक्याप र पालिकाले शुल्क लिने भए पनि यसको मारमा समग्र पर्यटन क्षेत्र पर्ने भन्दै पर्यटन व्यवसायीहरु रुष्ट बनेका हुन् । साथै, पर्यटन विभागले पनि पर्यटन बोर्ड र टानसँग मिलेर पदयात्रा सूचना प्रणालीका लागि पर्यटकसँग शुल्क लिँदै आएको छ । सार्क राष्ट्रका पर्यटकसँग १ हजार र तेस्रो मुलुकका पर्यटकबाट २ हजारका दरले शुल्क लिने गरेको छ ।

यसअघि नेपालीसँग भने शुल्क उठाउने गरिएको थिएन । तर, पालिकाले पालिकामा पर्यटकीय क्षेत्रको व्यवस्थापनका लागि भन्दै पालिकाले आन्तरिक पर्यटकसँग १ सय र विदेशी पर्यटकसँग ५ सय रुपैयाँ शुल्क लिने निर्णय गरेको थियो । पदमार्गको पूर्वाधार निर्माण, सूचना केन्द्र स्थापना, सोलार बत्ती जडान र फोहोर मैला व्यवस्थापनका लागि शुल्क लिने निर्णय भएको पालिकाको दाबी छ ।

यो रुटमा मर्दी हिमाल ट्रेक पछिल्लो समय पदयात्री र पर्यटकको रोजाइमा पर्छ । यहाँका माछापुच्छ्रे मोडल ट्रेक र ग्रेट माछापुच्छ्रे ट्रेक गरी २ पदमार्ग चर्चित छन् । पदमार्ग पर्यटनलाई प्रोत्साहन गर्नुपर्नेमा पालिकाले शुल्क लिने नाममा पर्यटक तर्साउने काम गरेको मर्दी हिमाल पर्यटन व्यवसायी बताउँछन् । पालिकाले निर्णय फिर्ता नलिए विरोधमा उत्रिने व्यवसायीहरुको चेतावनी छ ।