पोखरा ।

नेपाल कम्युनिस्ट पार्टी (एमाले) गण्डकीको प्रदेशसभा संसदीय दलले भूकम्पपीडितलाई एक साताको पारिश्रमिक पठाउने निर्णय गरेको छ । आइतबार बसेको एमाले संसदीय दलको आकस्मिक बैठकले यस्तो निर्णय गरेको हो ।

एमाले संसदीय दलका नेता खगराज अधिकारीले प्रत्येक प्रदेशसभा सदस्यको एक साताको पारिश्रमिक पठाउने निर्णय भएको जानकारी दिए । ६० सदस्यीय गण्डकी प्रदेशसभामा एमालेका २२ सदस्य छन् । प्रदेशसभा उपसभामुख विनाकुमारी मगरलाई संसदीय दलले निर्देशन दिन नमिल्ने जनाउँदै नेता अधिकारीले २१ जनाको पारिश्रमिक करिब तीन लाख पठाइने उल्लेख गरे ।

गण्डकी प्रदेशका पूर्वमुख्यमन्त्रीसमेत रहेका अधिकारीले अहिले उद्धारको क्रम जारी रहेको जनाउँदै क्षतिको पूर्ण विवरण आइसकेपछि पुनस्र्थापना र पुनर्निर्माणका लागि थप सहयोग आवश्यक परे त्यसका लागि तयार रहेको जनाए । उनी भन्छन्, ‘गण्डकी सरकारले नै सबै सांसदसँग अनुरोध गर्ला कि भन्ने सोचेका थियौँ, कसै न कसैले सुरु गर्नुपर्छ भनी घोषणा गरेका हौँ ।’

एमाले संसदीय दलको बैठकले शुक्रबार राति गएको भूकम्पबाट निधन भएकाहरुप्रति श्रद्धञ्जलि व्यक्त गर्दै घाइतेहरुको शीघ्र स्वास्थ्यलाभको कामनासमेत गरेको छ । एमाले गण्डकी प्रमुख सचेतक गोविन्दबहादुर नेपालीले उद्धार, उपचार र पुनस्र्थापनामा कुनै कमी हुन नदिन आग्रह गर्दै संघीयताको मर्मअनुरुप एक प्रदेशमा विपत्ति आउँदा अर्काे प्रदेशले सहयोग गर्नुपर्नेमा जोड दिए ।