पोखरा ।
पोखरा अन्तर्राष्ट्रिय विमानस्थलमा बुधबार बिहानदेखि दिउँसोसम्म भिन्नै चहलपहल थियो । उच्च पदस्थहरुको आगमनको व्यवस्थापनमा विमानस्थल प्रशासन र सुरक्षा निकाय परिचालित थिए ।

बिहान ९ बजेति चिनिया सेनाका २ विमान विमानस्थलमा अवतरण गरे । गएको जनवरीबाट सञ्चालनमा आएको यो विमानस्थलबाट अझै नियमित अन्तर्राष्ट्रिय उडान हुन सकेको छैन । करिब ११ महिनाको अवधिमा ४ चार्टड उडान भएका छन् ।

गएको शुक्रबार जाजरकोट केन्द्रविन्दु भएर गएको भूकम्पपछि चीनले पठाएको राहत सामग्री लिएर २ विमान पोखरा आएका हुन् । भूकम्पमा परी जाजरकोट र रुकुम पश्चिममामा गरी १ सय ५३ जनाको मृत्यु भएको छ भने २ सय ५० भन्दा बढी घाइते भएका छन् ।

राहत सामग्री लिएर आएका चिनिया विमान बुधबार दिउँसो नै चीन फर्किएका छन् । यहाँ पहिलो वर्ष अन्तर्राष्ट्रिय उडानमा पार्किङ, ल्यान्डिङ लगायतका शुल्क नलाग्ने व्यवस्था गरिएको छ । अन्तर्राष्ट्रिय उडानमा यात्रुले प्रतिव्यक्ति ३ हजार रुपैयाँका विमानस्थल कर तिर्नुपर्छ ।

पोखरा महानगरका प्रमुख धनराज आचार्यले नियमित उडानअघि चार्टर्ड उडान नै हुने जनाउँदै यसले सकारात्मक सन्देश प्रवाह हुने बताउनुहुन्छ । ‘यस्ता उडानले सकारात्मक सन्देश प्रवाह गरेको छ, चाडै नियमित उडान हुने अपेक्षा पनि गरेका छौँ । अरु चार्टर्ड उडान पनि हुँदै छन्,’ उनले भने ।

गएको शुक्रबार जाजरकोट केन्द्रविन्दु भएर गएको भूकम्पछि चीनले पठाएको राहत सामग्री लिएर २ विमान पोखरा आएका हुन्

नेपाल उद्योग वाणिज्य महासंघका पूर्वअध्यक्ष आनन्दराज मुल्मी भिआइपी आगमन र चार्टडले पोखराको पर्यटन र उडान क्षेत्रमा सकारात्मक सन्देश प्रवाह गर्ने भए पनि नियमित उडानमै जोड दिनुपर्ने विचार राखे । ‘पोखराबाट कुनमिन हुँदै हङकङ, पोखरा चेन्दु जस्ता उडानका लागि पहल गर्नुपर्छ । सरकार र जिम्मेवार निकायले इच्छाशक्तिसहित काम गर्नुपर्छ, यति ठूलो लगानीलाई बर्बाद हुन दिनुहुन्न ।’

यसअघि चीनको छेन्दुबाट सिचुआन एयरलाइन्सको जहाज आएको थियो । पोखरामा भएको ड्रागन बोट रेसमा सहभागी खेलाडी र अतिथिलाई लिएर सिचुआनको जहाज आएको थियो । सिचुआनको जहाज फर्किदा रित्तै थियो । विमानस्थल सञ्चालन भएको ८ महिनापछि पोखरा अन्तर्राष्ट्रिय विमानस्थलबाट पहिलो व्यावसायिक उडान भएको थियो । ड्रुक एयरको जहाज भुटानको पारो अन्तर्राष्ट्रिय विमानस्थलबाट पोखरा आएको थियो ।

३ यात्रु लिएर आएको १ सय ५० यात्रु क्षमताको ड्रुकको त्यो जहाज पोखराबाट ४२ पर्यटक लिएर भुटान फर्किएको थियो । ड्रुक भुटानको राष्ट्रिय ध्वजावाहक विमान कम्पनी हो । पारो अन्तर्राष्ट्रिय विमानस्थलबाट यसले १० अन्तर्राष्ट्रिय गन्तव्य र तीन आन्तरिक विमानस्थलमा उडान भर्दै आएको छ । यसले काठमाडौंमा पनि उडान गर्ने गरेको छ ।

त्यही उडानबाट अन्तर्राष्ट्रिय उडनमा यो विमानस्थलले पहिलोपटक आम्दानी गरेको थियो । त्यो उडानलाई पोखरा अन्तर्राष्ट्रिय विमानस्थलबाट भएको पहिलो व्यावसायिक अन्तर्राष्ट्रिय उडान मानिएको छ । गएको जनवरी १ मा विमानस्थल उद्घाटन भए पनि यो अहिलेसम्म केही चार्टर्ड विदेशी उडान र आन्तरिक उडानमै सीमित छ । पोखरा अन्तर्राष्ट्रिय विमानस्थल बनाउन झन्डै २२ अर्ब रुपैयाँ लगानी भएको छ ।

भूकम्पपीडितलाई २८ करोडका ब्लांकेट र टेन्ट
चीन सरकारले बुधबार जाजरकोट र रुकुम पश्चिमका भूकम्प पीडितलाई करिब २८ करोडको राहत हस्तान्तरण गरेको छ । चिनियाँ राजदूत चेन सङले उपप्रधान तथा गृहमन्त्री नारायणकाजी श्रेष्ठलाई पोखरामा आयोजित समारोहमा बुधबार ती सामग्री हस्तान्तरण गरे ।

गृह मन्त्रालयका प्रवक्ता नारायणप्रसाद भट्टराईले ४ हजार ६ सय थान ब्याङ्केट र ६ सय थान टेन्ट चिनिया सरकारले प्रदान गरेको जानकारी दिए । चिनिया राहत सामग्री बुधबार दिउँसो नै ट्रकमार्फत् भूकम्प प्रभावित क्षेत्रमा पठाइएको छ ।

राहत बुझ्दै उपप्रधानमन्त्री श्रेष्ठले विपत्ति आउँदा दुवै छिमेकीले यथाशीघ्र सहयोग घोषणा गरी तत्काल उपलब्ध गराएकोमा धन्यवाद दिए । उनले भने, ‘नेपाल र चीन ऐतिहासिक मित्र देश हुन् । हाम्रो दुखसुखमा सधै चिनिया सहयोग रहँदै आएको छ ।’ गृहमन्त्री श्रेष्ठले एकद्धार प्रणालीबाट राहत र पुनर्निर्माणको काम हुने प्रष्ट पारे ।

‘एकद्वार भनेको ३ तहकै सरकारको समन्वयमा हुने काम हो । जिल्ला विपद् व्यवस्थापन समितिमार्फत् काम भइरहेको छ,’ उनी भन्छन् । गृहमन्त्री श्रेष्ठले नागरिकलाई यो विपदका बेला ४ कुरा सरकारले ग्यारेन्टी गरेको सुनाए । उनले भने, ‘कोही नागरिकले उपचार नपाउने नहोस्, भोकै नहुन्, कोही चिसोमा नसुतून्, कसैको बास खुला आकासमुनि नहोस् ।’ कर्मचारी, सुरक्षाकर्मी र जनप्रतिनिधि मिलेर एकीकृतमा प्रभावित क्षेत्रमा काम भइरहेको उनको भनाइ छ ।

अब चाडै सरकारले पुनस्र्थापना र पुनर्निर्माणण गर्ने उहाँको भनाइ छ । गोरखा महाभूकम्पबाट सिकेको पाठ लागू गरी यी अभियान प्रभावकारी बनाइने उनले सुनाए । विपदमा राजनीति नजोड्न आग्रह गर्दै गृहमन्त्रीले संकटका बेला एकजुट भएर लाग्न सबै पक्षलाई आग्रह गरे ।

कार्यक्रममा रातदूत सङले भूकम्पको क्षतिमा नेपालीसरह दुःख अनुभूति भएको जनाए । उनले बुधबार प्रदान गरिएको सहयोगका अतिरिक्त चिनिया रेडक्रसले छुट्टै राहतसमेत प्रदान गर्ने उल्लेख गरे । ‘शताब्दीऔंदेखि मित्रता रहेका नेपाल र चीनको मित्रता निभाउँदै हामीले मानवीय सहयोग गरेका हौँ । बेल्ट एन्ड रोड अवधारणमा अन्तर्गत नेपालमा धेरै काम गरिरहेका छौँ ।’ यसअघि नै चीनले केरुङ नाका हुँदै झन्डै १० करोडका २३ ट्रक राहत सामाग्री पठाएको छ ।