विश्वराज पौडेल
प्रथम उपाध्यक्ष तथा महोत्सव संयोजक
पोखराको समग्र पर्यटन प्रर्वद्धनको लागि रेवान पोखराले पोखरा सडक महोत्सव गर्दै आएको छ । विगत २५ वर्षदेखि गर्दै आएको सडक महोत्सव नेपालकै विशेष खालको महोत्सव हो । रजत जयन्ती वर्ष भएकाले विगतको भन्दा अहिलेको महोत्सवले विशेष महत्व राख्छ । अहिलेको महोत्सवले झन बढी रौंनकता थप्ने हाम्रो अपेक्षा छ ।

पोखराको प्रचारप्रसार र पर्यटकीय स्थलहरुलाई चिनाउन महोत्सवले सघाएको छ । रेवानले सबै पर्यटकलाई अंग्रेजी नयाँ वर्ष पोखरामा आएर मनाउन आग्रह गरेको छ । ‘सडकमै खाउँ, सडकमै नाचौं, सडकमै रमाऔं’ भन्ने मुल नाराका महोत्सव गरिँदै आएको छ । पुस १२ गतेदेखि १६ गतेसम्म अर्थात् २८ डिसेम्बरदेखि १ जनवरीसम्म चल्ने महोत्सवले पोखराको सेरोफेरोमा उत्पादन भएका सामग्रीको बजारीकरणमा सहयोग पुग्नेछ । हस्तकलाका सामग्रीको प्रदर्शनी गरिनेछ ।

फुड, म्युजिक र सांस्कृतिक कार्यक्रम महोत्सवको मुख्य विशेषता हो । महोत्सवमा साहासिक पर्यटन प्रवद्र्धनका लागि कार्यक्रम सञ्चालन गर्नुका अलवा पोखराको पर्यटकीय सम्भावनाको बारेमा टक सो गर्ने योजना छ । महोत्सवमा डुंगा रेस, वेटर रेस, विभिन्न समुदायको झाँकी, कन्सर्ट, आतिस बाजी (फायरवक्स)सँगै अन्य विभिन्न नयाँ कार्यक्रम हुने भएकाले महोत्सव अवधिभर पोखरा आउने पर्यटकले पूर्ण मनोरञ्जन लिन सक्ने छन् । हल्लन चोकदेखि कन्सर्ट आयोजना स्थलसम्म विशेष आरती र शिव ताण्डव नृत्य प्रदर्शन गरिनेछ । कोमागाने पार्कमा राष्ट्रिय स्तरका चर्चित कलाकारको प्रस्तुतिका अलवा सांस्कृतिक कार्यक्रम देखाउने कार्यक्रम तय भएको छ ।