काठमाडौं ।
सरकारले नेपालका अन्तर्राष्ट्रिय विमानस्थलको सञ्चालनमा सार्वजनिक–निजी साझेदारी ढाँचामा अघि बढाउने विकल्पमा छलफल भएको जनाएको छ । संस्कृति, पर्यटन तथा नागरिक उड्डयनमन्त्री सुदन किरातीले त्रिभुवन अन्तर्राष्ट्रिय विमानस्थलसहित नवनिर्मित भैरहवास्थित गौतमबुद्ध अन्तर्राष्ट्रिय विमानस्थल र पोखरा अन्तर्राष्ट्रिय विमानस्थलका साथै निकट भविष्यमा निर्माण हुने निजगढ अन्तर्राष्ट्रिय विमानस्थललाई एउटै ढाँचामा सञ्चालन गर्नेगरी छलफल चलिरहेको जनाए ।

राष्ट्रियसभा अन्तर्गतको प्रत्यायोजित व्यवस्थापन तथा सरकारी आश्वासन समितिको सिंहदरबारमा भएको बैठकमा मन्त्री किराँतीले अन्तर्राष्ट्रिय सफल अभ्यासअनुरुप अन्तर्राष्ट्रिय विमानस्थलको सञ्चालनमा सार्वजनिक–निजी साझेदारी (पिपिपी) मोडलमा अघि बढाउनेगरी बहस भइरहेको जनाएका छन् ।

ठूलो खर्च भएका पोखरा र भैरहवा विमानस्थललाई पूर्ण सञ्चालनमा ल्याउन र भैरहवा अन्तर्राष्ट्रिय विमानस्थलबाट छिमेकी मुलुकका नजिकका विमानस्थलसम्म कम उचाइमा उडान गर्ने साना विमान सञ्चालनको पहल पनि भइरहेको उनको भनाइ छ । ‘काठमाडौँसहित भैरहवा र पोखरा अन्तर्राष्ट्रिय विमानस्थललाई नयाँ ढंगले सञ्चालनका लागि प्रक्रियामा अघि बढ्दै छ । चार वटै विमानस्थल पिपिपी मोडेलमा सञ्चालन गर्न छलफल भइरहेको छ,’ उनले भने ।

पर्यटनमन्त्री किरातीले ठूलो लगानीमा निर्माण भएका अन्तर्राष्ट्रिय विमानस्थल घाम तापेर बसिरहेको तथा आन्तरिक २२ वटा विमानस्थल गौचरनको रुपमा परिणत भएको उल्लेख गरे । उनले काठमाडौँ विमानस्थल जति विस्तार गरे पनि अबको ८/१० वर्षपछि उडान चाप धान्न नसक्ने भएकाले विकल्पको रुपमा निजगढ अन्तर्राष्ट्रिय विमानस्तथल निर्माण गर्नुपर्ने बाध्यता रहेको जिकिर गरे ।