पोखरा । लापरवाही ढंगले कार चलाएर दुई युवतीको ज्यान लिने मानबहादुर बानियाँ पुर्पक्षका लागि कारागार चलान भएका छन् । जिल्ला अदालत कास्कीमा आइतबार भएको थुनछेक बहसका क्रममा न्यायाधीश ऋषिराम आचार्यको इजलासले कारचालक बानियाँलाई पुर्पक्षका लागि थुनामा पठाउने आदेश दिएको हो ।

गत मंसिर २४ गते आइतबार दिउँसो सवा ४ बजे पृथ्वीराजमार्ग अन्तर्गत लेखनाथको सुन्दरीबजारमा मानबहादुरले चलाएको कारले विपरित दिशाबाट आईरहेको स्कुटरलाई ठक्कर दिदाँ दुई युवतीको ज्यान गएको थियो । सो दुर्घटनामा गण्डकी मेडिकल कलेजमा अध्ययनरत पोखरा–५, जिरोकिमीकी २४ वर्षीया भावना बराल र पोखरा–२५, हेमजाकी २३ वर्षीया अनिशा खड्काको मृत्यु भएको थियो ।

प्रत्यक्षदर्शीका अनुसार अर्घौं निवासी कार चालक बानियाँले अनियन्त्रित ढंगले कार हाँक्दै विपरित दिशामा पुगेर स्कुटरलाई ठक्कर दिदाँ सो दुर्घटना भएको थियो ।