पोखरा ।
सहारा क्लब पोखराले यस वर्ष सर्वाेत्कृष्ट राष्ट्रिय फुटबल खेलाडी सम्मान आयुष घलाललाई प्रदान गरिने भएको छ । उहाँलाई नगद ५० हजार ५ रुपैयाँ र सम्मानपत्रसहित सम्मान गरिने सहारा क्लबले जनाएको छ ।

पोखरामा मंगलबारदेखि सुरु हुने २३ औं आहा रारा पोखरा गोल्ड कपको उद्घाटन समारोहमा फुटबल खेलाडी घलाललाई सम्मान गरिने क्लब अध्यक्ष केशवराज बरालले बताए । राष्ट्रिय टिमका मिडफिल्डर घलाल हेटौडा उपमहानगरपालिका वडा १८ का बासिन्दा हुन् ।

२०७४ देखि हालसम्म भरत खवास, किरणकुमार लिम्बु, सुजल श्रेष्ठ, अभिषेक रिजाल, अञ्जन बिष्ट र अनन्त तामाङ यसबाट सम्मानित भएका छन् । माघ ९ देखि २० सम्म पोखरा रंगशालामा हुने यस वर्षको आहा रारा पोखरा गोल्ड कपमा आयोजकसहित १२ टिमले भाग लिएका छन् । आजको खेलमा आयोजक सहारा र थ्रिस्टार क्लबबिच हुनेछ ।

पोखरा अन्तर्राष्ट्रिय फुटबल स्टेडियमममा सञ्चालन हुने प्रतियोगिताको तयारी पूरा भएको आयोजकले जनाएको छ । प्रतियोगितामा विजेताले १२ लाख १ हजार र उपविजेता टोलीले ६ लाख १ हजार नगदसहित मेडल, ट्रफी लगायत प्रदान गरिनेछ । अघिल्लो संस्करणको उपाधि संकटा क्लबले जितेको थियो भने भुटनिज युथ स्पोर्टस क्लब मिनोसोटा अमेरिका उपविजेता बनेको थियो ।