पोखरा ।
सफल पोखरा अन्तर्राष्ट्रिय म्याराथन फागुन ५ गते हुने भएको छ । यस म्याराथनलाई सव्य र भव्य बनाउन आयोजक भूतपूर्व खेलाडी मञ्चले २३ वटा उपसमिति नेपालमा र ५ वटा अन्तर्राष्ट्रिय समिति (बेलायत, संयुक्त राज्य अमेरिका, अस्ट्रेलिया, हंगकंग, सर्भेया) बनाएर काम अघि बढाएको छ ।

१८ औँ संस्करणमा आई पुग्दा स्वदेशी तथा विदेशी धावकले नयाँ रुटमा दौडिदै म्याराथन पुरा गर्नेछन् । सुरुवात पोखरा रंगशालाबाट हुनेछ । समापन भने पोखरा–६ हल्लनचोकस्थित क्याम्पिङ चौरसाइटमा हुने छ ।

सफल दूधको मुख्य प्रायोजन र भूतपूर्व खेलाडी मञ्च नेपालको आयोजनामा हुन लागेको सफल पोखरा अन्तर्राष्ट्रियता म्याराथनको मूल नारा ‘स्वास्थ्यका लागि, पोखराको लागि’ छ । देशकै मोफसलमा हुने सबैभन्दा ठूलो म्याराथनले पोखरा तथा पोखरावासीको गरिमालाई अन्तर्राष्ट्रिय स्तरमा चिनाउँदै आइरहेको छ ।

यसपालि म्याराथनलाई विशेष बनाउन मुख्य म्याराथनका विधाहरुका सहभागीहरूलाई चिप्सको प्रयोग गरिने भएको छ । त्यसले धावकको दौड समय सटिक तरिकाले मापन गर्छ ।

सफल पोखरा अन्तर्राष्ट्रिय म्याराथनले प्रथम विजेतालाई ५ लाख रुपैयाँ, दोस्रोलाई ३ लाख रुपैयाँ, तेस्रोलाई २ लाख रुपैयाँ र चौथोलाई ३० हजार रुपैयाँ प्रदान गर्ने घोषणा गरेको छ । गण्डकी प्रदेशको खेलाडीहरूलाई प्रोत्साहन स्वरूप छुट्टै पुरस्कारको व्यवस्था पनि छ । अरू बिदाहरू जस्तै महिला हाफ म्याराथन, १० किमि पुरुष तथा महिला, ५ किमि छात्र, छात्रा, ह्विल चियर तथा दृष्टिविहीनतर्फका हरेक प्रतियोगितामा पनि पुरस्कार राखिएको छ ।

सफल पोखरा अन्तर्राष्ट्रिय म्याराथनलाई अझ व्यापक बनाउन पोखराकै प्रतिष्ठित औद्योगिक प्रतिष्ठान सुजल डेरी प्रालिको सफल दूधको मुख्य प्रायोजन छ । शारीरिक तन्दुरुस्ती र पौस्टिकतासँग सम्बन्ध राख्ने सफल दूधले पोखरावासीको स्वास्थ्य र खेलको सम्बन्धलाई अझ प्रगाढ बनाउने कुरामा विश्वस्त रहेको कम्पनीले जनाएको छ ।

९ वर्षदेखि लगातार प्रायोजन गर्दै आइरहेको सफल दूधले उपभत्ताको स्वास्थ्य प्रतिको विश्वासलाई कायम गर्नुको साथै पोखरावासीको मन जित्न सफल यस्तो कार्यक्रम आयोजना गरेकोमा गौरवान्वित भएको कम्पनीले बताएको छ । कम्पनीले मुख्य प्रयोजन ३ वर्षका लागि नवीकरण पनि गरेको छ ।

सम्पूर्ण पोखरा बासीहरूलाई फागुन ५ गते हुनगइरहेको सफल पोखरा अन्तर्राष्ट्रिय म्याराथनमा सहभागी भई ‘स्वास्थ्यका लागि, पोखराका लागि’ दौडिन कम्पनीले आवहान गरेको छ ।