जोमसोम ।
मुस्ताङमा पछिल्लो समय प्रहरीले गाँजा फडानी अभियानलाई तीव्रता दिएको छ । जिल्ला प्रहरी कार्यालय मुस्ताङको अभियानमा इलाका प्रहरी कार्यालय लेते र प्रहरी चौकी कोवाङबाट खटिएको प्रहरी टोलीले बिहीबार थासाङ गाउँपालिका ५ टिटी तालवरपर प्राकृतिक रुपले उम्रिएका गाँजाका बोट फडानी गरेको हो ।

अवैध गाजा फडानी गर्न इलाका प्रहरी कार्यालय लेते र प्रहरी चौकी कोवाङबाट ८ जनाको प्रहरी टोली थासाङको टिटी पुगेको थियो । उनीहरुले त्यहा प्राकृतिक रुपमा उम्रिएका करिब ४ हजार बोट अवैध गाजा नष्ट गरेको हो । पर्यटक गन्तव्य टिटी ताल घुम्न जाने युवायुवतीले त्यहाँ पुगेर प्राकृतिक रुपमा उम्रिएका गाँजा सेवन गर्ने गरेको भन्ने सूचनाको आधारमा प्रहरीले फडानी गरेको मुस्ताङका प्रहरी नायब उपरीक्षक भोजराज पाण्डेले जानकारी दिए ।

अघिल्लो पटक सोही स्थानमा प्रहरीले करिब ४ रोपनी सार्वजनिक जग्गामा प्राकृतिक रुपले फैलिएको गाँजा फडानी गरी नष्ट गरेको थियो । पाण्डेले आगामी दिनमा प्राकृतिक रुपले गाँजा उम्रिने बेलामा प्रहरी टोली परिचालन गरी फडानी गर्ने योजना सुनाए । जिल्ला प्रहरी कार्यालय मुस्ताङले फागुन महिनाको पहिलो सातादेखि जिल्लाका सबै सामुदायिक तथा निजी विद्यालयमा लागुऔषधसम्बन्धी सचेतना कार्यक्रम सञ्चालन गर्ने तयारी गरेको छ ।