पोखरा ।
पोखरा १३ मा आगामी शुक्रबार जब फेयर हुने भएको छ । पोखरा महानगरपालिका वडा नं. १३ कार्यालयको आयोजनामा कार्यक्रम हुन लागेको हो ।

वडामा भएका बेरोजगार युवायुवतीलाई लक्षित गरी कार्यक्रम राखिएको वडाध्यक्ष किरण बरालले बताए । जब फेयरमा १२ स्टलबाट रोजगारी सिर्जना गर्ने गरी प्रशिक्षण दिइनेछ । वडामा भएका कोही युवा पनि बेरोजगार बस्न नपर्ने वातावरण सिर्जना गर्ने उद्देश्यले कार्यक्रम गर्न लागिएको उनले बताए ।

‘अहिलेको सबैभन्दा प्रमुख समस्या रोजगारी सिर्जना हो । वडामा भएका बेरोजगार युवायुवतीलाई रोजगारी दिलाउने गरी वडाले जब फेयर कार्यक्रमको अवधारणा अगाडि सारेका हौं’, उनले भने । लायन्स र लियो क्लब पोखराको सहकार्यमा उक्त फेयर हुने वडाध्यक्ष बरालले जानकारी गराए ।

शुक्रबार वडा कार्यालयमा नै बिहान ९ बजेदेखि साँझ ४ बजेसम्म उक्त कार्यक्रम राखिएको छ । जब फेयरमार्फत वडाका बेरोजगार युवाले रोजगार पाउनेमा वडाध्यक्ष आशावादी देखिन्छन् ।

वडाका नागरिकको आयस्तर सुधार्न पनि जब फेयर कार्यक्रम सहयोग बन्ने उनले बताए । भौतिक विकाससँगै आर्थिक विकासमा समेत सुधार ल्याउने ध्येय बमोजिम जब फेयर कार्यक्रम राखिएको उनको भनाइ छ । बरालले जब फेयर कार्यक्रममा उपस्थित भएर लाभ लिन वडाबासीलाई आग्रह गरेका छन् । फेयरमा उत्पादनदेखि प्रविधिमैत्री विषयमा जानकारी मिल्नेछ ।