पोखरा ।
मृगौला पीडित पासाङ लिम्बु शेर्पालाई आर्थिक सहयोग हस्तान्तरण गरिएको छ । इलाम जिल्ला स्थायी घरभै हाल पोखरा महानगरपालिका वडा नम्बर ६ बस्दै आएकी शेर्पाको उपचारका लागि संकलित १ लाख १० हजार रुपैयाँ बिहीबार पोखरा महानगरपालिकाका उपप्रमुख मञ्जुदेवी गुरुङमार्फत पीडितलाई हस्तान्तरण गरिएको हो ।

सुवेदार कर्णबहादुर गुरुङले मृगौला पीडित शेर्पाको सहयोगका लागि स्वदेश र विदेशमा रहेका सहयोगीहरुबाट संकलित रकममा पोखरा महानगरपालिकाबाट १० हजार रुपैयाँ थप गरी रकम हस्तान्तरण गरिएको हो । कर्णबहादुरले सहयोगका लागि निवेदन दिएका थिए । ‘उपचारका लागि बेलायत, पोखरा लगायत व्यक्ति र संस्थाबाट संकलन गरेको र महानगरबाट पनि थप सहयोगका लागि निवेदन दिएका थिए । यहाँबाट १० हजार प्राप्त भयो, सबै गरेर १ लाख १० हजार उपप्रमुखमार्फत हस्तान्तरण गरियो,’ कर्णबहादुरले भने ।

उनको निवेदन अनुसार महानगरले विपन्नलाई प्रमुुख र उपप्रमुुखले दश हजार सम्म सहयोग गर्न पाउने व्यवस्था अनुसार उपप्रमुख मञ्जुुदेवी गुरुङले १० हजार थप गरी एकमुष्ठ रकम हस्तान्तरण गरिएको हो । पीडित शेर्पाका श्रीमान् र १ छोरी छन् । शेर्पा विगत ३ वर्षदेखि मृगौला पीडित रोगको उपचार गराउँदै आएकी छन् ।

सहयोग रकम प्राप्त गरेपछि शेर्पाले आफनो उपचारका लागि सहयोग संकलन गर्ने बुवा कर्णबहादुर गुरुङ र सहयोग गर्ने सम्पूर्णलाई धन्यवाद व्यक्त गरे । ‘यो सहयोगले मेरो उपचारमा राहत पुग्ने छ,’ उनले भने । पोखरा महानगरका उपप्रमुख मञ्जुदेवी गुरुङले मृगौला पीडित शेर्पाको स्वास्थ्य लाभको कामना गर्दै सहयोग संकलन गर्ने कर्णबहादुरप्रति धन्यवाद व्यक्त गरिन् ।