पोखरा ।
पोखरेली युवा सांस्कृतिक परिवार (पोयुसाप)ले सर्वज्ञमान विष्णुदेवी संस्कृति पुरस्कार २०८० प्राप्त गरेको छ । भैरव सांस्कृतिक संरक्षण समितिले प्रदान गर्ने यो वर्षको पुरस्कार पोयुसापले प्राप्त गरेको हो ।

शनिबार पोखरामा भएको एक कार्यक्रममा पोयुसापका अध्यक्ष उपेन्द्र पौडेलले उक्त पुरस्कार संस्थाकोतर्फबाट ग्रहण गरेका हुन् । पौडेललाई कार्यक्रमका प्रमुख अतिथि पोखरा महानगरपालिकाका मेयर धनराज आचार्यले हस्तान्तरण गरे । १ लाख १ रुपैयाँ नगद राशि र सम्मानपत्रका साथ मेयर आचार्यले अध्यक्ष पौडेललाई प्रदान गरेका हुन् ।

भैरव सांस्कृतिक संरक्षण समितिका अध्यक्ष तीर्थमान प्रधानांगले पोखरालाई साहित्य, संस्कृति र कलाको राजधानी बनाउन पोयुसापले प्रशंसीय कार्य गरेकाले पुरस्कार अर्पण गरिएको जानकारी दिए । यसभन्दा अघि यो पुरस्कार फत्तेमान, सत्यमोहन जोशी, अम्बर गुरुङ, प्रेमध्वज प्रधान, जगमान गुरुङले प्राप्त गरिसकेको छन् । पोखरेली युवा सांस्कृतिक परिवारका अध्यक्ष पौडेलले संस्थालाई छनोट गरेर पुरस्कृति गरिदिने सांस्कृतिक संरक्षण समितिलाई धन्यवाद दिए ।

उनले भने, ‘धेरै धन्यवाद श्री भैरव सांस्कृतिक संरक्षण समितिलाई ! बधाई छ पोखरेली युवा सांस्कृतिक परिवारका सम्पूर्ण संस्थापक, पूर्व अध्यक्षहरू तथा पूर्व तथा वर्तमान कार्यसमिति, आजीवन सदस्य, सल्लाहकार एवम् शुभचिन्तकहरूमा ! वधाई हामीलाई ।’