लेखनाथ ।
पोखरा महानगरपालिका वडा नं २७ को शिक्षा समितिले एसइइ दिएर बसेका विद्यार्थीलाई निःशुल्क कम्प्युटर तालिम दिएको छ । वडा नम्बर २७ को संयोजन र वडा नं २९, ३०, ३१ र ३२ समन्वयमा १५ दिने कम्प्युटर र व्यक्तित्व विकास तालिम सुरु गरिएको हो ।

पोखरा २७ का अध्यक्ष पूर्णकुमार गुरुङले तालिम सुरुआत गरे । उनले विद्यार्थीको सिकाई समयानुकूल परिवर्तन हुनुपर्नेमा जोड दिए । पोखरा २९ का अध्यक्ष श्रीप्रसाद गुरुङलेसुन्दर भविश्यका लागि आजैदेखि मेहेनत र लगन जरुरी हुने औंल्याए ।

कार्यक्रममा लक्ष्मी आदर्श माविका प्रधानाध्यापक शिवमणि भण्डारीले अहिलेको अवस्थामा कम्प्युटर शिक्षा नजान्नु निरक्षर हुनु जस्तै हुने जनाए । कार्यक्रममा शिक्षा समितिका सदस्य यम रोक्का, वडा सदस्य जितेन्द्र क्षेत्रीले पनि बोलेका थिए । १५ दिनसम्म चल्ने तालिममा २ सय ५० विद्यार्थी सहभागी छन् ।