पोखरा ।
पोखरा नदीपुरस्थित पोखरा कलेज अफ म्यानेजमेन्ट (पिसिएम) मा पिसिएम फेस्टिबल भएको छ । पढाइ सँगसँगै विभिन्न किसिमका उत्प्रेरणात्मक कार्यक्रमबाट विद्यार्थीको मनोबल बढाउने उद्देश्यले पिसिएम स्टुडेन्ट क्लबको सक्रियतामा फेस्टिबल भएको हो ।

कलेजकी प्राचार्य लिना नेगी श्रेष्ठले कलेजका विद्यार्थीको मिलनसँगसँगै उनीहरुको प्रतिभा पहिचान र प्रदर्शनीका लागि यो कार्यक्रम फलदायी बनेको जनाइन् । ‘कार्यक्रमको मुख्य उद्देश्य भनेको विद्यार्थीमा भएको प्रतिभा प्रस्फुटन र सबै सेमेस्टरमा भएका विद्यार्थीको मिलन पनि हो,’ प्राचार्य श्रेष्ठले भनिन्, ‘स्पोर्टस् मिटबाहेक अरु कार्यक्रमले विद्यार्थीलाई मिलन गराउन नसकिरहँदा यो अर्को मीठो अवसर बनेको छ ।’

हरेक वर्ष तालिका नै बनाएर ५ वटा विशेष कार्यक्रम गर्दै आएको पिसिएममा यो वर्षदेखि पिसिएम फेस्टिबल पनि थपिएको छ । यस कार्यक्रममा विद्यार्थीले आर्ट्स, स्टल म्यानेजमेन्ट लगायत गायन तथा नृत्य प्रस्तुति गरेको क्लबका अध्यक्ष मिलन कँडेलले जानकारी दिए ।

औपचारिक कार्यक्रमपछि ब्यान्ड र डिजेले प्रस्तुति राखेका थिए । आर्ट प्रतियोगितामा सविना सुनार सर्वोत्कृष्ट भइन् । शौरभ लामिछाने द्वितीय, ऋसुता हमाल तृतीय तथा स्वर्णिम शाक्य र एसिका गुरूङ तृतीय भए । विजेतालाई नगदसहित पुरस्कृत गरिएको छ । कार्यक्रमको सञ्चालन एञ्जिला सुवेदी र सम्राट गुरूङले गरेका थिए ।