पोखरा ।
पोखरा ९ न्युरोडमा म्याजिक मेडिकेयर सञ्चालनमा आएको छ । ५० लाख लागतमा सञ्चालनमा आएको मेडिकेयर २ महिना अघि सञ्चालनमा आएको हो ।

बिरामीलाई सहज र सर्वसुलभ रुपमा औषधी उपलब्ध गराउने उद्देश्यले मेडिकेयर सञ्चालनमा ल्याएको मेडिकेयरका सञ्चालक सुवर्णराज पन्तले बताए । सेवा लिन आउने सर्वसाधारणलाई सहज र सरल रुपमा सेवा दिने उद्धेश्य सहित उनीहरुका समस्यालाई मध्यनजर गरि मेडिकेयर सञ्चालन गरिएको उनको भनाइ छ ।

मेडिकेयरले बाल, महिला तथा पुरुष हेरचाह, कपाल, छाला सम्बन्धि सामग्री, दैनिक जीवनमा आवश्यक पर्ने स्वास्थ्य सम्बन्धित सामग्री लगायतका सुविधा उपलब्ध गराउने पन्तले जानकारी दिए । आवश्यकता अनुसार सुविधा विस्तार गर्दै जाने योजना रहेको उनले सुनाए ।

‘औषधि किन्ने बेला औषधि बनेको र म्याद सकिने मिति तथा खाने तरिका र समयबारे स्वास्थ्यकर्मीसँग राम्रोसँग बुझ्नुपर्छ,’ उनले भने ‘औषधिको बनेको र म्याद सकिने मिति औषिधको पछाडिपट्टि स्पष्टसँग लेखिएको हुन्छ । यदि लेखिएको छैन भने त्यस्तो औषधि किन्नुहुँदैन ।’

पोखराका पन्तको पुख्र्याैली घर पर्वत हो । उनले चरक एकेडेमीबाट डिप्लोमा इन फार्मेसी गरेका हुन् । उनी नोबेल एकेडेमीमा ब्याचलर इन फार्मेसी अध्ययनरत छन् । पन्त नेपाल फार्मेसी संघ गण्डकीका सचिव हुन् । उनले १० वर्ष म्याजिक मेडी कन्सर्न सञ्चालन गरेपछि सेवा विस्तार गरेका हुन् ।

एन्टिबायोटिकको जथाभावी विक्री र प्रयोग भइरहेकोप्रति उनले चिन्ता व्यक्त गरे । ‘औषधी पसलले डाक्टरको सल्लाहविना विक्री गर्न नहुने तथा बिरामीले पनि डाक्टरको सल्लाहविना औषधीको प्रयोग गर्न हुँदैन ।’

एन्टिबायोटिकको जथाभावी प्रयोगले ठूलो समस्या निम्तिन सक्ने बताउँदै औषधी पसलमा नियमित अनुगमन र बिरामीलाई जनचेतना जगाउन आवश्यक रहेको उनले औंल्याए ।

मेडिकेयरले निशुल्क घैंटामा पानी पनि उपलब्ध गराइरहेको छ । ‘पानी पनि किनेर खानुपर्ने बाध्यता छ, सबैले पानी किन्न पनि सक्दैनन्, सानो सहयोग भएपनि गर्न सकियोस् भनेर निशुल्क पानी वितरण गर्न थालेको हुँ,’ पन्तले भने ।

उनले थपे, ‘पहिला वरपिपल, चौतारोमा घैंटामा पानी राख्ने चलन थियो त्यही परम्परालाई जोगाउन साथै यसबाट पूण्य प्राप्त हुन्छ भन्ने विश्वास पनि छ ।’