पोखरा । पछिल्लो पटक पोखरा महानगरपालिकाले वडा नं.२ र ७ मा किसान बजार विस्तार गरेको छ । ग्रामीण क्षेत्रका वडाहरूमा उत्पादित ताजा तरकारीहरूको बजार व्यवस्थापन गर्दै महानगरपालिकाद्धारा सञ्चालित कृषि एम्बुलेन्स मार्फत ढुवानी गरिएको कृषि उपजहरू यस प्रकारका कृषि बजारहरू मार्फत विक्री वितरण हुँदै आएको छ ।

यसले उत्पादक र उपभोक्तालाई सिधा जोड्ने काम गरेको पोखरा महानगरपालिकाको आर्थिक विकास महाशाखाका प्रमुख मनहर कडरियाले बताए ।

ग्रामीण क्षेत्रका कृषकहरूलाई थप उत्पादन वृद्धिमा हौसला प्रदान गर्दै महानगरपालिकाले बिउ, बिरुवा र मल लगायतका अनुदान लगायतका कार्यक्रम समेत सञ्चालन गरिएको उनले बताए ।

महानगर क्षेत्रमा उत्पादित कृषिजन्य उपजहरूको सङ्कलनका लागि २१ स्थानमा सङ्कलन केन्द्र, १० स्थानमा किसान बजार र विभिन्न वडा तथा स्थानीय टोल विकास संस्थाहरूको समन्वयमा विक्री केन्द्रहरू सञ्चालन गरिएको छ ।