पोखरा ।
नेपाली भाषा शिक्षक परिषद् कास्की नेपालले माविस्तरीय हिज्जे प्रतियोगिता आयोजना गरेको छ । शुक्रबार र शनिबार भएको प्रतियोगिताबाट न्याश्नल इन्भेन्टिभ मावि प्रथम, भाष्कर मावि द्वितीय, ग्लोबल कलेजियट तृतीय, केफ मावि चौथो र मदरल्यान्ड मावि र शान्तिबाटिका मावि सान्त्वना बनेका छन् ।

‘भाषा सभ्यताको संवाहक हो’ भन्ने उद्घोषका साथ स्थापना भएर नेपाली भाषा शिक्षणसँग सम्बन्धित विभिन्न शिक्षक केन्द्रित र विद्यार्थीकेन्द्रित कार्यक्रमका साथै भाषिक अनुसन्धानमुलक कार्य गर्दै आएको छ । प्रतियोगिताबाट ५९ समूह सहभागी थिए ।

हिज्जे प्रतियोगिताको निर्णायकमा नेपाली भाषा शिक्षक परिषद्का सल्लाहकार डोलराज अर्याल, उपाध्यक्ष बिक्रम पौडेल, महासचिव शिवहरि सुवेदी, सचिव नारायण पराजुली, शशिशिशिर ढुंगाना लगायत थिए ।

कार्यक्रममा शिक्षा विकास निर्देशनालय, गण्डकी प्रदेशका प्रमुख अम्बिकाप्रसाद आचार्यले यस्ता कार्यक्रमले विद्यार्थीमा नेपाली भाषाका शब्द भण्डार विकास हुनुका साथै भाषिक प्रयोगको क्षमता वृद्धि हुने धारणा राखे ।

संस्थाका अध्यक्ष डिल्लीराम अर्यालको अध्यक्षतामा भएको कार्यक्रममा नेपाली भाषा शिक्षक परिषद्का सल्लाहकार प्राडा रामनाथ ओझा, उपप्रा डा बोधराज ढकाल, प्याब्सन कास्की अध्यक्ष मथुराप्रसाद पौडेल, संस्थाका उपाध्यक्ष विक्रम पौडल, वरिष्ठ उपाध्यक्ष सूर्यप्रसाद लम्साल, सचिव नारायणप्रसाद पराजुली लगायतले बोलेका थिए ।