पोखरा ।
पोखराका शिक्षासेवी नरनाथ भट्टराईले सम्मान वापत पाएको रकममा थप गरी विद्यालयलाई सहयोग गरेका छन् । बाटुलेचौर निवासी भट्टराईले जोर्ज जोन शिक्षा प्रतिष्ठानवाट सम्मानित हुँदा प्राप्त गरेको नगद १० हजारमा, १० हजार थप गरी नगद २० हजार रुपैयाँ स्थानीय विन्ध्यवासिनी माविलाई सहयोग गरेका हुन् ।

विद्यालय व्यवस्थापन समितिका पूर्वअध्यक्ष समेत रहेका भट्टराईले विद्यालयको शैक्षिक विकासका लागि बिहीबार सो रकम बराबरको चेक विद्यालयका प्रधानाध्यापक कृष्णप्रसाद आचार्य र सहायक प्रधानाध्यापक रामबहादुर बानियाँलाई हस्तान्तरण गरे ।

कार्यक्रममा भट्टराईले विद्यालय राष्ट्रिय स्तरको नमुना विद्यालयको रूपमा चिनिएको मा खुसी व्यक्त गर्दै, आफूले गरेको सहयोग सानो भएपनि यसले महत्व राख्ने बताए । प्रधानाध्यापक आर्चायले भट्टराईले विद्यालयका हरेक गतिविधिमा सहयोग पु¥याउँदै आएको भन्दै उनको सम्मानले विद्यालयको पनि गौरव बढेको बताए ।

सहायक प्रधानाध्यापक बानियाँले भट्टराईमा अन्तर्निहित, उदारमना, एवं परोपकारी भावनाको उच्च मूल्यांकन गर्दै कार्यको प्रशंसा गरे । भट्टराई जोर्ज जोन शिक्षा प्रतिष्ठानको २८ औं वार्षिकोत्सवको अवसरमा, शिक्षासेवीको रूपमा सम्मानित भएका थिए ।