पोखरा ।
अपांग महिला सशक्तीकरण केन्द्र कास्कीले स्याङ्जामा गुणस्तरीय प्रजनन् स्वास्थ्य तथा अधिकारसम्बन्धी विद्यालय स्तरीय सचेतनामूलक कार्यक्रम गरेको छ ।

कार्यक्रममा सरस्वती माध्यमिक विद्यालय, गैरीखेत र चण्डिका बहिरा आधारभूत विद्यालयका बहिरा विद्यार्थी, अभिभावक शिक्षक कर्मचारीको सहभागिता रहेको संस्थाका अध्यक्ष अन्जना केसीले जानकारी दिइन् ।कार्यक्रममा संस्थाकी अध्यक्ष केसी, महासचिव वन्दना गुरुङ र कर्मचारी सरिता केसीले अपांगताको परिभाषा र प्रकार, रजस्वला, गर्भपतन, परिवार नियोजन, पाठेघरको क्यान्सर र स्तन क्यान्सरका बारेका सहजीकरण गरेका थिए ।

समारोहमा सहभागी विद्यार्थीले रजस्वालाको समयमा भोग्नु परेका समस्याबारे अवगत गराएका थिए । विद्यालयकी फोकल शिक्षक सुनिता अर्यालले विद्यालयमा पुतलीबजार नगरपालिकाले पहिला निशुल्क वितरण गर्ने सेनेटेरी प्याडको गुणस्तरमा कमी भएको दाबी गरिन् । उनले अहिले नगरपालिकाले नगद उपलब्ध गराउने र विद्यालयले सेनेटरी प्याड खरिद गरेर वितरण गर्दा गुणस्तरीमा ध्यान दिन आग्रह गरिन् ।