पोखरा ।
आई केयर फाउन्डेसनको ४० औं वार्षिकोत्सव पोखरामा पनि विशेष कार्यक्रम गरी मनाइएको छ । फाउन्डेसनले पोखराको हिमालय आँखा अस्पताललाई स्थापनादेखि नै सहयोग गर्दै आएको छ ।

कार्यक्रममा फाउन्डेसनकी बोर्ड डाइरेक्टर इन्दिरा रोम्लेले लक्ष्य प्राप्तिका लागि हिमालय आँखा अस्पतालले गरेका कामको प्रशंसा गरिन् । उनले आँखा उपचारका लागि आवश्यक नेटवर्क विस्तार सँगसँगै गुणस्तरमा पनि विकास गरेकोमा देख्दा खुसी लागेको उनको भनाइ छ ।

नेपाल नेत्रज्योति संघका केन्द्रीय सभापति प्राडा चेतराज पन्तले नेपालमा अन्धोपन र आँखाका रोगहरुको निवारण र उपचारमा फाउन्डेसनको सहयोग चिरस्मरणीय र उल्लेखनीय रहेको जनाए । उनले पिछडिएका क्षेत्रमा अझै ठूलो समुदाय आँखा उपचारको पहुँचमा नरहेको उल्लेख गर्दै फाउन्डेसनको सहयोगको निरन्तरताको अपेक्षा गरे ।

नेत्रज्योति संघ कास्की सभापति वरिष्ठ अधिवक्ता सुरेन्द्र थापामगरले गण्डकी, धौलागिरी र कर्णालीमा आँखाको उपचारका लागि अस्पतालले चालेका कदमबारे प्रकाश पारे । उनले भने, ‘आँखा उपचारको क्षेत्रमा नयाँ चुनौती देखिएका छन्, ती चुनौती सामना गर्न नयाँ प्रविधि जरुरी छ । त्यसका लागि फाउन्डेसनसहित सबैको सहयोग मिल्ने अपेक्षा गरेका छौँ ।’

कार्यक्रममा फाउन्डेसनका कन्ट्री डाइरेक्टर अनिल गोर्खाली, संघ कास्की सचिव नारायण बराल, म्याग्दी शाखा सभापति अमर बानियाँ लगायतले बोलेका थिए ।

५१ बेडको यो अस्पतालले नेपालको २५ प्रतिशत भूभागमा बस्ने १० प्रतिशत जनसंख्यालाई सेवा दिइरहेको अस्पतालकी मेडिकल डाइरेक्टर प्राडा इलिया श्रेष्ठले जानकारी दिइन् । यो अस्पतालले आँखाका रोगको उपचार, जनचेतना, शिविरसँगसँगै आँखाबारे औपचारिक शिक्षासमेत दिइरहेको छ ।