पोखरा ।
नेपाल यातायात स्वतन्त्र मजदुर संगठन गण्डकी प्रदेश महिला कमिटीले यातायात क्षेत्रमा कार्यरत महिला मजदुरलाई समेटेर हरितालिका तीज विशेष कार्यक्रम गरेको छ ।

नेपाल ट्रेड युनियन महासंघ (जिफन्ट) गण्डकी प्रदेश महिला अध्यक्ष संगीता पाण्डेले जिफन्टले धेरै भन्दा धेरै श्रमिकलाई सामाजिक सुरक्षा कोषमा आबद्ध गराउने लक्ष्यसहित देशव्यापी अभियान सञ्चालन गरेको जानकारी दिइन् । उनले औपचारिक क्षैत्रका श्रमिकबाट सुरुवात भएको अभियान वैदेशिक रोजगारीमा जाने श्रमिकहँुदै अनौपचारिक क्षेत्रमा श्रमिकलाई कोषमा समेटिन थालेको बताइन् । उनले अनौपचारिक क्षेत्रमा योगदानमा आधारित सामाजिक सुरक्षा योजनालाई कार्यान्वयन गर्न चुनौती रहेको उल्लेख गरिन् ।

नेपाल यातायात स्वतन्त्र मजदुर संगठनका उपमहासचिव विष्णुबहादुर पराजुलीले यातायात क्षेत्रमा महिला सहभागिता कमी भएको बताए । संगठन गण्डकी प्रदेश कमिटीका अध्यक्ष विष्णुबहादुर केसीले अनौपचारिक क्षेत्रका मजदुरलाई सामाजिक सुरक्षा योजनामा समेट्नका लागि स्थानीय तहले सिफारिस गर्न पर्ने जनाए ।

कार्यक्रममा जिफन्ट गण्डकी प्रदेश महिला कमिटीका सदस्य शर्मिला देवकोटा, नेपाल यातायात स्वतन्त्र मजदुर संगठन गण्डकी प्रदेश कमिटीका उपाध्यक्ष बेनीराज थिङ, संगठनका प्रदेश कमिटीका सचिव नारायण रिमाल, सहसचिवहरु बालकृष्ण पोखरेल र जनकराज सिग्देल, कोषाध्यक्ष केशवराज खतिवडा, संगठन गण्डकी प्रदेश महिला कमिटीका अध्यक्ष सीता सापकोटा, सचिव मनीषा सुवेदी लगायतले महिला श्रमिकका सवालमा बोलेका थिए ।