पोखरा ।
पोखरा महानगरपालिका ९ तुलसीघाटमा पुल निर्माण सुरु भएको छ । पोखराको इन्द्रेणी निर्माण कम्पनीले १२ करोड, ८० लाख रुपैयाँ लागतमा तुलसीघाटमा पुल निर्माण गर्न लागेको हो ।

दसैं अघि निर्माण सक्ने गरी तिव्र रुपमा काम भइरहेको भौतिक पूर्वाधार विकास तथा यातायात व्यवस्था मन्त्रालय सडक विभाग पुल सेक्टर पोखराका इन्जिनियर प्रतिभा शर्माले जानकारी दिइन् ।

संरचना राखेर फिक्सिङ भइरहेको उनले बताइन् । ‘चरण चरणमा संरचना राख्दै जाने हो, बटम राखेर फिक्सिङ भइसकेको छ । वियरिङ राखिसकेको छ केहि दिनमा फिक्सिङ पनि सकिन्छ,’ शर्माले भनिन् ।

लगभग एक तिहाइ काम सकिएको उनको भनाइ छ । संरचना राख्ने र फिक्सिङ सकेपछि पुलछेउका सडक तथा पुलमा कालोपत्रे गरेपछि निर्माण सम्पन्न हुने उनले बताइन् । उनले भनिन्, ‘महेन्द्रपुलको वैकल्पिक पुलका रुपमा रहेकाले प्राथमिकतामा राखेर काम गरिरहेका छौं ।’

निर्माणधीन ‘आर्कब्रिज’ ६५ मिटर लामो र ११ मिटर चौडाइको हुनेछ । पुल निर्माणका लागि २०७९ पुसमा कम्पनीले गण्डकी प्रदेशको भौतिक पूर्वाधार विकास मन्त्रालयसँग सम्झौता गरिएको थियो ।

सम्झौताको ३० महिनाभित्र सम्म काम सम्पन्न भइसक्नुपर्ने छ । पुल निर्माण सम्पन्न नभएकाले महेन्द्रपुल, पृथ्वीचोकमा दैनिक जाम पर्ने समस्या परेको छ जसका कारण पोखरावासी हैरान छन् ।

के हो आर्क ब्रिज ?
खोलाको वारिपारि सडकको चौडाइ बराबरकै ‘अब्युटमेन्ट’ अर्थात् बलियो जगसहितको संचरना निर्माण गरिन्छ । सामान्य पुलमा जस्तो बीच/बीचमा पिल्लर प्रयोग गरिँदैन । पिल्लर नभए पनि यो नयाँ प्रविधिमा आधारित भएका कारण बलियो मानिन्छ साथै निर्माणका लागि लाग्ने लागत पनि कम छ ।

सामान्य पुलमा लोड पिलरमा थाम्छ तर आर्क व्रिजमा लोड आर्कले नै लिन्छ र छड्के केवलले आर्कमा लोड ट्रान्सफर गर्ने गर्दछ ।

सवारीसाधन गुड्दा पुलमा भाइब्रेसन नआउने र पिलर निर्माण गर्न नसकिने खोच तथा अप्ठ्यारा ठाउँमा समेत यी पुल सहजै निर्माण गर्न सकिन्छ ।

तुलसीघाटको पुरानो पुल साविक पोखरा नगर पञ्चायतका तत्कालीन प्रधानपञ्च सीताराम केसीको पालामा २०४६ सालमा निर्माण भएको हो । चाइना इन्टरनेसलन वाटर एण्ड इलेक्ट्रिक कर्पोरेसन पोखराले १५ लाख रुपैयाँमा पुल निर्माण गरेको थियो ।