पोखरा ।
पोखरा ७ मासबारमा रहेको समाज सेवा युवा क्लबको २९ औं स्थापना दिवसको अवसरमा शुभकामना आदान प्रदान तथा अन्तक्र्रिया सम्पन्न भएको छ ।

कार्यक्रममा पोखरा ७ का वडा अध्यक्ष राममोहन आचार्यले सामाजिक र विकास निमार्ण कार्यमा वडा सधैं वडावासी र वडामा रहेका संस्थाहरुको साथमै रहने बताए । वडा सदस्य विष्णुमणि बरालले वार्षिक रुपमा गरिने कार्यक्रमको कार्ययोजना बनाएर लाग्न आग्रह गरे ।

क्लबका पूर्वअध्यक्ष एवं नेकपा एमाले पोखरा ७ का अध्यक्ष किशोर बरालले आफ्नो सामाजिक कार्यको जग नै क्लब रहेको स्मरण गरे । नेपाली कांग्रेस पोखरा ७ का सभापति नवीनराज बरालले युवा गतिशील हुने भएकाले क्लबका कार्यक्रम आफैमा अभियान र सामाजिक विकृति विसंगति विरुद्घ सन्देश दिने संस्था रहेको बताए ।

वातावरण संरक्षणका लागि महाअभियान कास्कीका संयोजक रामबहादुर पौडेलले क्लबको विगतकोे क्रियाशीलतालाई अब फेरि अगाडि बढाउनुपर्नेमा जोड दिए । श्रीकृष्ण माविका विद्यालय व्यवस्थापन समिति अध्यक्ष शोभाचन्द्र बरालले विगतमा समयमै पुस्तान्तरण नगर्दा समस्या आएको बताए ।

डिज्नील्याण्ड एकेडेमीका प्राचार्य नरेशप्रसाद बरालले नयाँ पुस्तामा पठन संस्कृतिको विकास गर्न क्लबले सुरुवात गर्नुपर्ने सुझाव दिए । महिला क्लबका अध्यक्ष मीना आचार्यले आफूहरु पनि क्लबसँगै सहकार्य गरेर सामाजिक कार्यमा संलग्न हुँदै आएको सुनाइन् ।

महिला विकासका लागि आमा समूहका अध्यक्ष तुलसी बरालले समाजको समस्या समाजले नै समाधान गर्नुपर्ने बताए ।

कार्यक्रममा क्लबकोे विगतका बारेमा क्लबका पूर्वसचिव प्रमोद पौडेल, हालको कार्यको जानकारी र हालको समस्याका बारेमा क्लबका संरक्षक रमेश बरालले मन्तव्य राखे । क्लबका अध्यक्ष मधु अधिकारीको अध्यक्षता सम्पन्न उक्त कार्यक्रममा स्वागत उपाध्यक्ष युद्ध बराल र सञ्चालन कार्यसमिति सदस्य सुमन पौडेलले गरेका थिए ।