पोखरा ।

लेखनाथ उद्योग वाणिज्य संघको आयोजनामा निशुल्क नेतृत्व विकास र मौरीपालनसम्बन्धी आधारभूत तालिम आयोजना गरिएको छ।

संघको आयोजनामा भएको तालिममा १ सयभन्दा बढी संघमा आवद्ध सदस्य, व्यवसायी एवं कृषकको सहभागिता थियो ।

सहभागीलाई मौरीपालनको परिचय महत्व, वर्तमान अवस्था, अवसर र चुनौतिहरु, मौरीको जीवन चक्र र वर्ग विभाजन, मौरीको शारिरिक बनावट कार्य विभाजन, मौरीगोला निरीक्षण, मौरी गोलामा हुने वार्षिक जीवनचर्या आदिबारे सिकाइएको थियो ।

यस्तै, गोला व्यवस्थापन, मौरीमा हुल निर्यास र त्यसको व्यवस्थापन, मौरी गोला संयोजन तथा मौरी गोला विभाजन प्रयोगात्मक र व्यहारिक रुपमा सिकाइएको छ ।

वाली विशेषज्ञ धनबहादुर राना र रमेशराज पौडेलले प्रशिक्षण दिएका थिए । नेतृत्व विकास तालिममा पत्रकार दीपेन्द्र श्रेष्ठले सहजीकरण गरेका थिए । कार्यक्रममा लेखनाथ उद्योग वाणिज्य संघका संस्थापक अध्यक्ष चन्द्रकृष्ण कर्मचार्यले तालिममा सिकेका कुरालाई व्यवहारमा ल्याउनुपर्ने बताए ।

संघका अध्यक्ष विनोद श्रेष्ठले सिकेको सीप निरन्तर अभ्यासमा ल्याए दीर्घकालीन बन्ने बताए ।