पोखरा ।
शुभम् बचत तथा ऋण सहकारी संस्थाको अध्यक्षमा सूर्यप्रसाद पौडेल चयन भएका छन् । शुक्रबार पोखरामा भएको संस्थाको १२ औं साधारणसभाले पौडेलको अध्यक्षतामा ९ सदस्यीय सञ्चालक समिति चुनेको हो ।

पौडेल यसअघि उपाध्यक्ष थिए । निर्वाचन समिति संयोजक वरिष्ठ अधिवक्ता पदमपाणि देवकोटाले समितिको उपाध्यक्षमा कृष्णप्रसाद पोखरेल, सचिव अशोक पौडेल र कोषाध्यक्षमा होमराज भट्टराई निर्वाचित भएको जनाए । समिति सदस्यमा गोविन्दप्रसाद बास्तोला, चीजकुमारी गुरुङ, अमृत पन्त, अनुप पाण्डे र लक्ष्मीदेवी बराल छन् ।

साधारणसभाले ज्ञानेन्द्र थापाको संयोजकत्वमा ३ सदस्यीय लेखा तथा सुपरिवेक्षण समिति गठन गरेको छ । समितिका सदस्यमा कालीप्रसाद भुर्तेल र पूर्णकला घर्ती छन् ।

कार्यक्रममा सहकारी रजिष्ट्रार कार्यालय गण्डकीका रजिष्ट्रार भेषराज रिजालले पछिल्लो समय सञ्चालकसमेतको मिलेमतोमा कमसल धितो राखेर ऋण लगानी भएका सहकारीहरू समस्याग्रस्त रहेको र तिनीहरूले चाहेर पनि बचतकर्ताको बचत रकम फिर्ता गर्न सक्ने अवस्था नरहेको बताए ।

उनले सहकारीले ऋण लगानी गर्दा भनसुन, प्रलोभन र लोभमा नपरी सुरक्षित धितो बन्धक राखेर कर्जा प्रवाह गरेको खण्डमा कुनै कारणले ऋणीले ऋण तिर्न नसकेको खण्डमा त्यस्तो धितोको लिलामीबाट असुलउपर गर्न सकिने र बचत कर्ताको बचत पनि सुरक्षित हुने बताए ।

कास्की बचत तथा ऋण सहकारी संस्थाका अध्यक्ष शेरबहादुर कार्कीले आफ्नो सहकारीको वित्तीय अवस्था कस्तो छ र कसरी सञ्चालन भएको छ भनेर सेयर सदस्य आफैंले चासो राख्नुपर्ने बताए । सहकारी अभियन्ता भीम गुरुङले कास्कीमा १०÷२० सहकारी समस्याग्रस्त रहेको भए पनि सहकारीका बारेमा चलेको नकारात्मक हल्ला र आर्थिक मन्दीको समेत असर सबै सहकारीमा परेको बताए ।

सञ्चालक आफैले संस्थाको पैसा मनोमानी हिसाबले चलाउँदा, बिना धितोमा ऋण लगानी गर्दा र खोला छेउ तथा पाखा पखेराका कमसल धितोमा अधिक मूल्य कायम गरी लगानी गर्दा सहकारीहरू समस्या ग्रस्त बनेको उनको भनाइ छ ।

सभामा अघिल्लो आर्थिक वर्षभरमा उत्कृष्ट कारोबार र उत्कृष्ट कार्यसम्पादन गर्नेहरुलाई सम्मान गरिएको छ । ऋण असुलीमा उल्लेखनीय योगदान गर्ने जोखिम व्यवस्थापन उपसमिति संयोजक कुमार आचार्य साधारणसभामा सम्मानित भए । उत्कृष्ट कारोबारकर्ताका रूपमा ज्ञानबहादुर पुर्जा, शुष्मा पुन, सुनिताकुमारी श्रेष्ठ, रविलाल पहारी, बबिता अधिकारी भुर्तेल, सन्तोष बराल, हरिप्रसाद अधिकारी, लेखनाथ अधिकारी र विक्रमबहादुर थापा सम्मानित भए ।

कर्मचारीतर्फ व्यवस्थापक कमल कोइराला, सहव्यवस्थापक कृष्ण देवी थापा, कर्जा प्रमुख सचिन पाठक र बजार प्रतिनिधि प्रयास सुवेदी सम्मानित भए । कार्यक्रम अध्यक्ष राजन पन्तको अध्यक्षता भएको हो ।