जोमसोम ।
मुस्ताङको घरपझोङ २ मार्फा स्थित शीतोष्ण बागवानी विकास केन्द्रमा मंगलबारदेखि एक हप्ते स्याउ टिप्ने खाने मेला सुरु भएको छ । केन्द्रले पर्यटन प्रर्वद्धनका लागि मेला सुरु गरेको हो ।

मार्फाकोस्याउ बगैचामा अहिले लटरम्म स्याउ फलेका छन् । असोज १ गतेदेखि जिल्ला स्तरको निर्णय अनुसार मुस्ताङका स्याउ बगैचामा धमाधम स्याउ टिप्ने कार्य सुरु भएको छ । यसै क्रममा केन्द्रले मुस्ताङ भ्रमण गर्ने अनुकूल समय तथा स्याउ टिप्ने सिजन सुरु हुँदा पर्यटन प्रर्वद्धन गर्न मेला सञ्चालन गरेको केन्द्र प्रमुख पद्मनाथ आत्रेय बताउँछन् ।

यसका लागि केन्द्रले आफ्नो कार्यक्षेत्रभित्र उत्पादन भएको स्याउ क्षेत्र अन्तर्गत एक क्षेत्र तोकेको छ । बागवानीले पर्यटकलाई स्याउ टिप्ने, खाने सुविधा उपलब्ध गराउन कार्यालय अगाडिको सीमित क्षेत्र तोकेको छ । दर्जन बोटमा फलेका राताम्मे स्याउ पर्यटक आफैंले सीमित शुल्क तिरेर बगैचा घुम्दै धित मरुन्जेल टिपेर खान पाउने व्यवस्था गरेको केन्द्र प्रमुख आत्रेयले सुनाए ।

तोकिएको स्याउ बगैचामा पुगेर स्याउ टिपेर खान प्रतिव्यक्ति २ सय राजस्व तिनुपर्छ । स्याउ टिप्ने, खाने मेलामा पर्यटकले बगैचाभित्र फोटो, भिडियो र सेल्फी खिच्न पाउने छन् ।