पोखरा ।
संघीय सरकारको शिक्षा मन्त्रालयबाट पोखरा विश्वविद्यालयको स्कुल अफ बिजनेस (व्यवस्थापन संकाय) ले साढे २ लाख रुपैयाँको पुरस्कार प्राप्त गरेको छ । शिक्षा दिवसको अवसरमा मन्त्रालयले पोविविको उक्त संकायलाई देशभरकै उत्कृष्ट क्याम्पसको पुरस्कार प्रदान गरेको हो ।

विश्वविद्यालय अनुदान आयोगले गरेको मूल्यांकनका आधारमा विश्वविद्यालयतर्फका आंगिक कलेजहरुमा पोविविको स्कुल अफ बिजनेस उत्कृष्टमा पर्न सफल भएको शिक्षा मन्त्रालय जनाएको छ । शिक्षा दिवसका अवसरमा बुधबार काठमाडौंमा आयोजित कार्यक्रममा प्रधानमन्त्री केपी शर्मा ओलीले उक्त पुरस्कार स्कुल अफ बिजनेसका निर्देशक डा श्रृजन ज्ञवालीलाई हस्तान्तरण गरे । समारोहमा शिक्षा मन्त्री विद्या भट्टराई पनि सहभागी थिइन् । पुरस्कार ग्रहणका क्रममा निर्देशक ज्ञवालीसँगै पोविविका उपकुलपति प्राडा उपकुलपति प्रेमनारायण अर्याल पनि सहभागी थिए ।