पोखरा ।
गण्डकी प्रदेशका भौतिक पूर्वाधार विकास तथा यातायात व्यवस्था मन्त्री प्रकाशबहादुर केसीले पोखरा महानगरपालिका २५ मा बनेको चौर अम्बोट झोलुंगे पुल उद्घाटन गरेका छन् ।

करिब ७५ लाखमा निर्माण भएको पुल बुधबारबाट सञ्चालनमा आएको हो । पुल निर्माणका लागि आस्था निर्माण सेवाले गत चैतमा ७४ लाख ९४ हजार ५ सय रुपैयाँ सम्झौता गरेको थियो । सम्झौताको ३ महिनाअघि गत असार १९ गते निर्माण सम्पन्न भएको थियो । पुलको लम्बाइ १ सय ९८ मिटर छ ।

कार्यक्रममा मन्त्री केसीले पर्यटन र कृषिलाई प्रवर्धन गर्न यो पुलले सघाउने विश्वास व्यक्त गरे । उनले सम्झौताअघि नै निर्माण सम्पन्न गर्ने कम्पनीलाई उनले धन्यवाद दिए । मन्त्री केसीले आगामी दिनमा पनि यस्ता विकास, निर्माणका कार्यले निरन्तरता पाउने वाचा गरे ।

योजनाहरुको काम तीव्र गतिमा अगाडि बढाउन मन्त्रालय मातहतका कार्यालयलाई मन्त्री केसीले आग्रह गरे । ‘भौतिक पूर्वाधार विकास मन्त्रालय गण्डकी प्रदेशका मातहतमा रहेका सम्पूर्ण कार्यालयलाई सम्पूर्ण योजनाको काम तीव्र गतिमा गुणस्तर कायम गर्दै सुचारु गर्न निर्देशन दिएको छु,’ उनले भने, ‘आफ्नो क्षेत्रमा परेका योजना समयमा नै तोकिएको गुणस्तरमा सम्पन्न गर्नको लागि खबरदारी गर्नु होला ।’

कार्यक्रममा गण्डकी प्रदेश सभा सदस्य गणेशमान गुरुङ, पूर्वाधार विकास कार्यालय कास्कीका सिडिइ सोभियत खड्का, कार्यवाहक वडाध्यक्ष धनाकुमारी तिमल्सिना पोखरेल लगायतले बोलेका थिए ।