पोखरा ।
आमा मिलन बचत तथा ऋण सहकारी संस्थाको सञ्चालक समिति अध्यक्षमा रामकुमार घिमिरे निर्वाचित भएका छन् । उपाध्यक्ष अर्जुन बञ्जरा, सचिव प्रवेशचन्द्र उप्रेती र कोषाध्यक्ष टीकाराम लम्साल छन् ।

आमामिलनका सदस्यमा परशुराम बराल, निर्मला घिमिरे र मीना थापा तथा लेखा सुपरिवेक्षक संयोजक छविलाल गौडेल, सदस्यमा राजेन्द्रप्रसाद आचार्य र विश्वराज पौडेल चुनिएका छन् ।

कार्यक्रमा जिल्ला सहकारी संघ कास्की महासचिव दीपक बास्तोलाले सञ्चालक समिति भनेको हेर्दा देखिने, छाम्दा भेटिने र बोलाउदा सुन्ने खालको हुनुपर्नेमा जोड दिए । सहकारीकी अध्यक्ष इन्दिरा पौडेलले सहकारी क्षेत्रमा देखिएका विकृति, विसंगति र वर्तमान अवस्थामा केही सहकारीको रकम अपचलनका घटना बाहिर आएको हुँदा आगामी दिन झनै चुनौतिपूर्ण रहेको औंल्याइन् ।

नवनिर्वाचित अध्यक्ष घिमिरेले संस्थालाई चलयमान बनाउन सदस्यहरुले संस्थामा नै कारोबार गर्ने, मासिक बचत नियमित गर्ने तथा आवश्यक रकममात्र फिर्ता लैजानुपर्नेमा जोड दिए । सञ्चालक समितिले कर्जा असुली प्रक्रिया मजबुत बनाउँदै सहकारी क्षेत्रमा आएका चुनौती पार गर्दै सेयर सदस्यको हितमा समर्पित हुने उनको भनाइ छ ।

संस्थाका प्रबन्ध निर्देशक धु्रवराज पौडेलले आमा मिलनमा कुनै समस्य नरहेको जनाउँदै सेयर सदस्यलाई निर्धक्क भई आफ्नै सहकारीमा कारोबार गर्न आग्रह गरे ।

कृष्णबहादुर थापा क्षेत्रीको संयोजकत्वमा लोकराज भण्डारी र श्रीबहादुर रानाभाट सदस्य रहेको निर्वाचन समितिले नेतृत्व चयनका लागि सहजीकरण गरेको थियो ।