पोखरा ।

पोखरा महानगरपालिका वडा नं ३२ लामेआहालस्थित राधाकृष्ण गुरुकुल संस्कृत विद्यालयमा १ लाख १ हजार १ सय ११ रुपैयाँ नगद एवं खाद्यान्न सहयोग प्राप्त भएको छ ।

विद्यालयको दीर्घकालीन सञ्चालनमा सहयोग पुर्‍याउने उद्देश्यका साथ पोखरा १६ निवासी धनबहादुर थापाले एक कार्यक्रमका बीच विद्यालय व्यवस्थापन समितिका अध्यक्ष नगेन्द्रप्रसाद रेग्मीलाई खाद्यान्न तथा उक्त रकम बराबरको चेक हस्तान्तरण गरे ।

समाजसेवी थापाले गुरुकुल संस्कृत विद्यालयको दीर्घकालीन सञ्चालनमा केही न केही सहयोग पुगोस् भन्ने उद्देश्यका साथ सहयोग गरेको बताए ।

विद्यालय व्यवस्थापन समिति अध्यक्ष नगेन्द्रप्रसाद रेग्मीले सिमित साधनस्रोतका बीच विद्यालय सञ्चालन भइरहेको जनाए । यस्ता सहयोगले यहाँको दीर्घकालीन सञ्चालन एवम् व्यवस्थापनमा सहयोग पुग्ने उनले विश्वास व्यक्त गरे ।

राधाकृष्ण मन्दिर शान्ति आश्रमका सहअध्यक्ष गणेशबहादुुर खत्रीले गुुरुकुल यहाँको गौरव भएको बताउँदै यसको दीर्घकालीन सञ्चालन र व्यवस्थापनका लागि सामूहिक प्रयास आवश्यक हुनेमा जोड दिए ।

विद्यालय व्यवस्थापन समितिका अध्यक्ष रेग्मीको अध्यक्षतामा भएको कार्यक्रममा विद्यालयका प्रधानाध्यापक प्रकाश उपाध्याय रेग्मी, राधाकृष्ण मन्दिर शान्ति आश्रमका सचिव घनश्याम खनाल, विद्यालयका सल्लाहकारहरू चन्द्रावती पौडेल, विष्णुबहादुर बस्नेत लगायतले बोलेका थिए ।