पाेखरा ।

पोखरा महानगरपालिका वडा नम्बर २२ स्थित मोतिचोक–रातोपहिरो लकुन्स्वाँरा सडक शिलान्यास गरिएको छ । पोखरा महानगरपालिकाका प्रमुख धनराज आचार्यले मंगलबार शिलान्यास गरेका हुन् ।

सडकको शिलान्यास गर्दै आचार्यले मानिसको आवागमन र कृषि उपजको ढुवानीका लागि सहज हुने विश्वास व्यक्त गरे । ग्रामीण सडकको स्तरोन्नति गरी सुविधा सम्पन्न बनाइ सहज आवागमन सुनिश्चित गर्न महानगरपालिका प्रतिबद्ध रहेको उनले बताए ।

‘यहाँको कृषि उपज उत्पादनका हिसाबले महत्वपूर्ण भएकाले बजार सुनिश्चित गर्न पूर्वाधार निर्माण आवश्यक छ,’ उनले भने ।

सडक करिब १.८ कि.मी लम्बाइ र ८ मिटर चौडा हुनेछ । २ करोड ३४ लाख ४२ हजार ३३० रुपैयाँ ९० पैसामा सडक निर्माणको जिम्मा एमएस आर्क डी/सिता जे भी पोखराले पाएको छ । चालु आर्थिक वर्ष भित्रमा निर्माण सम्पन्न हुने उक्त सडक सुविधा सम्पन्न हुने वडा अध्यक्ष हिमलाल बरालले जानकारी दिए ।