पोखरा ।

अम्बिका–भागवत फाउन्डेसन नेपालद्वारा हरेक २ वर्षमा प्रदान गरिने संघर्षशील सामाजिक पुरस्कारबाट यसपालि हरिदेवी कोइरालालाई सम्मान गरिने भएको छ ।

साहित्यकार अम्बिका भण्डारीको संयोजकत्वमा गोमा सोती र खडानन्द पौडेल रहेको प्रतिभा चयन समितिको सिफारिसलाई फाउन्डेसनको बैठकले अनुमोदन गरेको हो । पोखरा बैदाममा जन्मेकी हरिदेवी नेपाली लोकगीत, लोकदोहोरी गायन तथा साहित्य क्षेत्रका ३० को दशकदेखि क्रियाशील छिन् ।

उनका दर्जन साहित्यिक कृति, एक सय बढी लोकदोहारी गीति एल्बम र झण्डै ६ सय गीत रेकर्ड भएका छन् । दर्जनौं संघसंस्थामा संलग्न कोइराला यसअघि जनस्तरका १ सय ६० सम्मान, पुरस्कारबाट विभूषित भइसकेकी छन् ।

फाउन्डेसनले संघर्षबाट माथि पुगेका प्रतिभाको पहिचान गरी प्रोत्साहन गर्दै आएको अध्यक्ष भागवत नेपालले बताए । पुरस्कार यही कात्तिक २४ गते संस्थाको अधिवेशन तथा साधारण सभामा प्रदान गर्ने तयारी छ ।