लेखनाथ ।
गत कात्तिक २३ गतेदेखि सुरु भएको लेखनाथ जेसिजको जेसिज सप्ताह २०८१ मंगलबार सकिएको छ । हरेक वर्ष नयाँनयाँ कामका साथ जेसिज सप्ताह गर्दै आएको लेखनाथ जेसीजले जुनियर जेसिजको सहकार्यमा ५ दिनमा विभिन्न रचनात्मक तथा सन्देशमूलक सात वटा कार्यक्रम गरेर यस वर्षको जेसीज सप्ताह सकेको हो ।

समापन समारोहमा बोल्दै गण्डकी प्रदेशका पूर्वमुख्यमन्त्री खगराज अधिकारीले युवाहरुलाई ज्ञान, सिप र नेतृत्व गर्ने क्षेमतामा वृद्धि गरी उल्टो बाटोमा हिँड्न सक्नेहरुलाई सही बाटो र पाटोमा ल्याउने गरी जेसीजले चलाएको अभियानले राष्ट्र निर्माणमा सहयोग पुग्ने गरेको विश्वास दिलाएका थिए ।

सोही अवसरमा ट्राफिक कार्यलयका प्रहरी उपनिरीक्षक जनकबहादुर शाहीले जेसीजले नियम, विधि र प्रविधिका बारेमा जानकारी गराई सभ्य समाज निर्माणमा सहयोगी सिद्ध भएको धारणा राखेका थिए ।

लेखनाथ जेसिजका अध्यक्ष प्रकाश राइभाटको अध्यक्षतामा भएको कार्यक्रममा लेखनाथ जेसिजका पूर्वअध्यक्ष ऋषिराम जमरकटेल, लेखनाथ उद्योग वाणिज्य संघका महासचिव जानुका अधिकारी, पोखरा जेसिजका अध्यक्ष देवराज शर्मा लगायतले सामाजिक क्षेत्रमा जेसिजले गरेका कामका बारेमा चर्चा गरेका थिए ।

लेखनाथ जेसिजका महासचिव मौसम बरालले सञ्चालन गरेको कार्यक्रममा स्वागत मन्तव्य सचिव महेश वाग्लेले गरेका थिए । मूलसंयोजक सुशील ढुंगानाले सातव्यापी रुपमा भएका कार्यक्रमका वारेमा जानकारी गराएका थिए ।

जेसिज सप्ताह अन्तरगत झण्डोत्तलन, ट्राफिक सचेतना तथा निशुल्क चालक/सहचालकको स्वास्थ्य परीक्षण, निशुल्क पोशाक वितारण, स्लो वाइक रेस, नेतृत्व विकास तथा प्रतिवेदन लेखन, अन्तर विद्यालय हाजिरी जवाफ प्रतियोगिता लगायत कार्यक्रमहरु भएका थिए ।