लेखनाथ ।
लेखनाथ उद्योग वाणिज्य संघले आफ्ना सदस्यहरुका लागि आन्तरिक राजस्व कार्यालय पोखराको सहकार्यमा मंगलबार करदाता शिक्षा कार्यक्रम आयोजना गरेको छ । संघका अध्यक्ष विनोद श्रेष्ठको अध्यक्षतामा आयोजना गरिएको करशिक्षा कार्यक्रममा आन्तरिक राजस्व कार्यालयका कर अधिकृत सनु काफ्लेले कर प्रणाली र व्यवसायीहरुले कर प्रणालीमा दिनुपर्ने ध्यान र अहिले करमा आएको छुट व्यवस्थाबारे कार्यपत्र प्रस्तुत गरे ।

व्यवसायीहरुले राखेका जिज्ञासाबारे आन्तरिक राजस्व कार्यालय पोखराका प्रमुख कर अधिकृत शिव शर्माले प्रस्ट पारे । उद्योगी व्यवसायीहरुले तिरेको राजस्वबाट नै देश चल्ने हुँदा नेपाल सरकारले उद्योग व्यवसाय गर्न नयाँ पीडिलाई प्रोत्साहन गर्नुपर्ने र कर सप्ताहको उपलक्ष्यमा सबैलाई बधाई तथा धन्यवाद ज्ञापन गरेका थिए ।

राजस्वका कम्पयुटर अपरेटर सुदीप रेग्मीसहित संघका पदाधिकारी, कार्यसमिति सदस्य, सल्लाहकार, वस्तुगत संघ संघसंस्थाका प्रतिनिधि, बजार व्यवस्थापन समितिका प्रतिनिधि, संघका उपसमिति संयोजक र सदस्यहरु, एवं संघका सदस्यहरुको सहभागिता थियो । कार्यक्रम सञ्चालन संघका महासचिव जानुका पराजुली अधिकारीले गरेको कार्यक्रममा धन्यवाद ज्ञापन वरिष्ठ उपाध्यक्ष राजेन्द्र ओझाले गरेका थिए ।