पोखरा ।
विकासशील र उदीयमान देशहरुमा दिगो आर्थिक विकास र जीवनस्तर सुधारमा केन्द्रित कार्यक्रमहरू सञ्चालन गरिरहेको स्विस कन्ट्याक्टले पोखरामा सम्भावित दिगो पर्यटन विकासका आयोजनाहरूमा सहकार्यका लागि तयार रहेको जनाएको छ ।

पोखरा महानगरपालिकाका प्रमुख धनराज आचार्यसँगको भेटमा स्विस कन्ट्याक्टका कन्ट्री डिरेक्टर सञ्जय कार्की नेतृत्वको टोलीले सो प्रतिबद्धता जनाएको हो । टोलीमा कन्ट्री डिरेक्टर सञ्जय कार्की, तापेश न्यौपाने, क्रिस्टियन पालमर र सिपी तिम्सिना सहभागिता छन् ।

उनीहरुले पर्यटन राजधानी पोखराको दिगो पर्यटन विकासका लागि पर्यटन पूर्वाधार विकास, पर्यटन संस्कृतिको विकास र जीविकोपार्जन सुधारका लागि मानव संशाधन विकास लगायत विभिन्न क्षेत्रमा आफूहरु पोखरा महानगरपालिकासँग सहकार्य गर्न इच्छुक रहेको उल्लेख गरे ।

जवाफमा नगर प्रमुख आचार्यले समुन्नत पर्यटकीय पोखरा निर्माण गर्ने लक्ष्यका साथ महानगरपालिकाअघि बढिरहेको जनाउँदै पर्यटनमैत्री विकासका लागि लगानीका सम्भावनाहरू कायमै रहेको बताए । उनले स्थानीय रूपमा सहजीकरण गर्न पोखरा महानगरपालिका तयार रहको भन्दै पोखराको पर्यटन विकास, प्रवर्द्धन र संरक्षणका सम्बन्धमा लगानीका ढोकाहरु खुला रहेको जनाए ।

पोखरामा दिगो पर्यटन विकासमा सन्दर्भमा विभिन्न विकास साझेदारसँगको सहकार्यमा विभिन्न परियोजना सञ्चालनमा छन् ।