पोखरा ।
पोखरा जेसीजको ४५ औं शाखा अधिवेशन तथा पचासऔं वार्षिक साधारण सभाको अवसरमा ‘दिगो विकासका लागि युवा नेतृत्व’ विषयक विचार गोष्ठी भएको छ ।

पोखरा जेसीजका अध्यक्ष जेसी देवराज शर्माको अध्यक्षतामा भएको विचार गोष्ठीमा नेपाल जेसीजका पूर्व राष्ट्रिय अध्यक्ष तथा अष्ट्रेलियाका लागि नेपालि पूर्व राजदुत महेशराज दाहालले कार्यपत्र प्रस्तुत गरेका थिए ।

डा चन्द्र भण्डारी र पूर्व अर्थमन्त्री डा युवराज खतिवडाले दिगो विकासका लागि युवा नेतृत्व विषयमा बोलेका थिए । डा भण्डारीले नेतृत्व परिवर्तनले नै साचो अर्थमा दिगो विकासको आधार हुने दाबि गरे । उनले युवाले नेतृत्व लिएमा आफ्नो आवश्यकता अनुसारको काम गर्ने बताए ।

डा खतिवडाले दिगो विकासको लागि समाजमा रहेको चरम गरिबी हटाउनुपर्नेमा जोड दिए । युवाहरू विदेश पलायन हुने परिस्थिति मुख्यतया आर्थिक रहेका बताउँदै गरिबी हटाउँदै अर्थतन्त्र सुधार गरी लय समाउनपर्ने उनको भनाइ छ ।

पोखरा जेसीजका प्रकरण निर्देशक बिजय बरालले सञ्चालन गरेको कार्यक्रममा पोखरा जेसीजका पूर्व अध्यक्षहरु, सदस्यहरु, विभिन्न सामाजिक संघसंस्थाका प्रतिनिधिहरु गरी २५० जनाको उपस्थिति रहेको पोखरा जेसीजका महासचिव जेसी तिलकप्रसाद लामिछानेले बताए ।