काठमाडौं ।
लैंगिक हिंसा विरुद्धको १६ दिने अभियानमा जोन्टा, एनसेल फाउन्डेसन, युएनएफपिए र युनिसेफ नेपालले बालविवाह अन्त्यका संयुक्त रुपमा काम गरेका छन् । यसबारे जनसचेतना जगाउन आयोजित कार्यक्रममा महिला नेतृत्वमा रहेका संस्था, निजी क्षेत्रका प्रतिनिधि र विभिन्न सरोकारवालाले बालविवाह रोक्ने उपायबारे छलफल गरे ।

कार्यक्रममा जोन्टा अध्यक्ष बिना रानाले बालविवाह रोक्न सबै पक्षको सहकार्य अपरिहार्य रहेकोमा जोड दिइन् । युनिसेफ नेपालकी डेपुटी रिप्रेजेन्टेटिभ जी ह्युन राह, युएनएफपिए नेपालकी लैगिंक तथा मानव अधिकार विशेषज्ञ कमला विष्ट, कलाकार प्रकाश सपुत र एसडिजी स्टुडियोले ‘शिरमै फुर्के रिबन’ बोलको गीत सार्वजनिक गरे ।

गीतले किशोरकिशोरीलाई बालविवाहका असरबारे सचेत गराउने लक्ष्य लिइएको छ । नेपालमा बालविवाह अझै पनि लैंगिक समानता र महिला तथा किशोरीको सशक्तीकरणका लागि प्रमुख चुनौती बनेको छ । यहाँ तीनमध्ये १ किशोरीको १८ वर्षभन्दा पहिले नै विवाह हुन्छ । महिला, बालबालिका, तथा ज्येष्ठ नागरिक मन्त्रालयका उपसचिव दीपक ढकालले बालविवाह मानव अधिकार उल्लंघन भएको औंल्याउँदै यसलाई समाधान गर्न विभिन्न क्षेत्रको सहकार्य चाहिनेमा जोड दिए ।

युनाइटेड नेसनकी सिइडिएडब्ल्यु कमिटी सदस्य वन्दना रानाले महिला र किशोरीहरूका विविध आवश्यकतालाई प्राथमिकतामा राखी काम गर्ने संस्थाहरूले लैंगिक समानता प्रवर्धन गर्न थप पहल गर्नुपर्नेमा जोड दिइन् । एनसेलकी हेड अफ कर्पोरेट कम्युनिकेसन्स एन्ड सिएसआर विशाखालक्ष्मी खड्काले एनसेल समावेशी र समानतामा आधारित समाज निर्माणप्रति प्रतिबद्ध रहेको जनाइन् ।

‘एनसेलमा हामी लैंगिक हिंसा अन्त्य गर्नु केवल सामाजिक आवश्यकता नभई सबैको नैतिक जिम्मेवारी पनि हो भन्ने विश्वास राख्छौं । हामी यस सामूहिक प्रयासलाई प्रोत्साहन गर्न, समुदायलाई सशक्त बनाउन सक्ने वातावरण निर्माणतर्फ काम गर्न चाहन्छौं,’ उनले भनिन् ।