पोखरा । नेपाल शिक्षक संघका पूर्व अध्यक्ष मोहन ज्ञवालीको निधन भएको छ । उनको काठमाण्डुमा शुक्रबार निधन भएको हो ।

ज्ञवाली शुक्रबार दिउँसो पुतलीसडकमा साथीभाइसँग खाजा खाएर छुटेका थिए । साँझमा उनी सामाखुसीको साँघुरो बाटोमा बेहोश अवस्थामा भेटिएका थिए । प्रहरीले तत्कालै उनलाई अस्पताल लगेको थियो । त्यतिबेलासम्म उनको निधन भइसकेको थियो । हिँड्दै गर्दा उनलाई हृदयघात भएको अनुमान गरिएको छ ।

गुल्मीको थोर्गामा २०२० सालमा जन्मेका ज्ञवाली २०३८ सालमा उच्च शिक्षा पढ्न पोखरा आएका हुन् । उनले पोखराको पृथ्वीनारायण क्याम्पसबाट स्नातक तह उत्तीर्ण गरेका थिए । त्यसअघि देखि नै उनी शिक्षण पेसामा लागेका थिए ।

कास्कीकै हंसपुरमा पढाएका उनी त्यसपछिको लामो समय पोखराकै भद्रकालीमा पढाए । उनी केही समय भद्रकालीको प्रधानाध्यापक पनि भए ।

शिक्षक आन्दोलनमा लागेका कारण उनी काठ्माडौं जाउआउ गरिरहन परेका कारण उनी बेतलबी बिदामा बस्न हेडमास्टर छाडेका थिए ।

ज्ञवालीले पढाएका विद्यार्थी राजेन्द्र भण्डारी असाध्यै मेहनती र दक्ष, पेसाप्रति प्रतिबद्ध भएका अनि विद्यार्थीलाई जहिले पनि हौसला प्रदान गर्ने शिक्षकको रुपमा आफूले स्मरण गर्ने बताए । भण्डारी भद्रकालीकै निवर्तमान प्रअ हुन् ।

२०५० सालमा स्थायी भए पनि उनले पेन्सन भने पाएनन् । नेपाली कांग्रेसको समानुपातिक सूचीमा पर्ने आश्वासनपछि उनले अवधि अघि नै राजीनामा दिएका थिए । तर उनी समानुपातिकको सूचीमा परेनन् ।