पोखरा । अंग्रेजी भाषा शिक्षकहरुको पेशागत संगठन नेल्टाको गण्डकी प्रदेश शाखाले पोखरामा कार्यशाला आयोजना गरेको छ । नेल्टाले ताल बाराही माध्यमिक विद्यालयमा शनिबार र आइतबार गरी दुई दिने प्राज्ञिक अनुसन्धानमा आधारित आवासीय कार्यशाला आयोजना गरेको हो ।

गण्डकी प्रदेशका सबै जिल्लाबाट ३ जनाको दरले ३० शिक्षक कार्यशालामा सहभागी थिए । नेपालकै अंग्रेजी भाषा शिक्षणको क्षेत्रमा उत्कृष्ट मानिएको नेल्टा गण्डकीले प्रकाशित गर्दै आएको स्टार रेटेड जर्नलका प्रत्येक अंकमा गण्डकी प्रदेश भित्रकै अंग्रेजी शिक्षकहरुले अनुसन्धान गरी तयार पारिएका लेखलाई समावेश गराउने उद्देश्यले कार्यशाला सञ्चालन गरिएको नेल्टा गण्डकी सभापति कमलराज लम्सालले बताए ।

सहप्राध्यापक डा नवराज न्यौपाने र उपप्राध्यापक डा पिताम्बर पौडेलले कार्यशालामा संयुक्त सहजीकरण गरेका थिए । कार्यशालाको समापन सत्रमा नेल्टा स्याङ्जा अध्यक्ष ओमविकास सिंजाली र नेल्टा नवलपुर सदस्य रीता खड्काले कार्यशालाका व्यवहारिक विषयवस्तुले सहभागीको लेखन सीप विकास भएको, अनुसन्धानप्रति रुचि र प्रतिबद्धता बढाएको टिप्पणी गरे ।

नेल्टा गण्डकी सभापति कमलराज लम्सालले कार्यशालाका सबै सहभागीले प्रत्येक वर्ष कम्तीमा १ अनुसन्धानात्मक लेख नेल्टा गण्डकीद्वारा प्रकाशन हुने जर्नलमा वा अरु माध्यमबाट प्रकाशित गर्न लाग्ने प्रतिवद्धता गरे ।