पोखरा । कास्कीको अन्नपूर्ण गाउँपालिका वडा नं. ७ मा रहेको कान्छी बराह मन्दिर प्रवद्र्धनका लागि हाइकिङ आयोजना गरिएको छ । सो अवसरमा गण्डकी प्रदेश नीति तथा योजना आयोगका सदस्य दीपक भण्डारीले पर्यटकीय गन्तव्यहरुको प्रचारप्रसारमा हाइकर्स क्लबले उदाहरणीय कार्य गरेको बताउँदै समय मिलेसम्म आफू सहभागी हुने जनाए ।

उनले हाइकिङ कार्यक्रमलाई सहयोग पुग्ने गरी राज्यले नीति ल्याउनुपर्नेमा जोड दिए । पितम देउराली आमा समूहले हाइकिङमा सहभागीलाई स्वागत गरेको थियो । हाइकर्स टोलीलाई समाजसेवी कमल गुरुङले कान्छी वराहदेखि पितम देउरालीसम्म साथ दिएका थिए ।

व्यवसायी सञ्जु आचार्य पौडेलले त्यहाँ टंकी निर्माण गर्न, पैदल यात्रीलाई १२ महिना हिड्न सहज हुने सिंढी बनाउन र ठाउँ ठाउँमा डस्टबिन राख्नुपर्नेमा जोड दिइन् । हाइकिङमा पहिलो पटक सहभागी गायत्री खनालले कार्यक्रमलाई निरन्तरता दिन सुझाइन् ।

हरेक महिनाको अन्तिम शनिबार पोखरा आसपासका पर्यटकीय गन्तव्यमा हाइकिङ जाने गरेको हाइकर्स क्लब नेपालको ५३ औं कार्यक्रम कान्छी बराहमा भएको क्लब अध्यक्ष कृष्ण रानाभाटले जनाए ।