पोखरा ।
स्याङजाको वालिङ नगरपालिका वडानम्बर ३ राम्चेबाट पोखरा आई बसोबास गर्दै आएका गुरुङहरुको साझा संस्था स्याङजा राम्चेली गडाभाई तमु समाज पोखराको अध्यक्षमा औबहादुर गुरुङ चयन भएका छन् । समाजको १८ औँ साधारणसभा तथा छेठौँ अधिवेशनले औबहादुरको नेतृत्वमा नयाँ कार्यसमिति चयन गरेको हो ।

नवनिर्वाचित कार्यसमितिको प्रथम उपाध्यक्ष दुरमाया गुरुङ, द्वितीय उपाध्यक्षमा बलबहादुर गुरुङ, सचिवमा रुपसीँ गुरुङ, सह सचीव सुवेदार भिमबहादुर गुरुङ र निर्मला गुरुङ छन् । त्यसैगरी कोषाध्यक्षमा क्याप्टेन चमबहादुर गुरुङ, सहकोषाध्यक्षमा हरिप्रसाद गुरुङ र सदस्यहमा चीनमाया गुरुङ, जमान गुरुङ, ठगबहादुर गुरुङ, महिला संयोजक नरमाया गुरुङ र युवा संयोजक दर्शन गुरुङ चयन भएका छन् ।

अधिवेशनको निर्णायक मण्डलमा समाजका संस्थापक अध्यक्ष ओमबहादुर गुरुङ संयोजक र निवर्तमान अध्यक्ष भुपेन गुरुङ र संस्थापक सचिव आशिष गुरुङ सदस्य थिए । कार्यक्रममा कोषाध्यक्ष गुरुङले आर्थिक प्रतिवेदन र सचिव दिलमायाले प्रगती प्रतिवेदन पेश गरेका थिए ।

यसैबिच समाजले तमुहरुको महान पर्व सप्र्ही ल्होसार २०८१ समेत भव्यताका साथ मनाएको छ । सप्ह्री ल्होसारको अवसरमा समाजले शुभकामना आदान प्रदान एवम चेलीबेटी भेटघाट स्योकैं कार्यक्रम गरि ल्होसार मनाएको हो ।

समाजका संस्थापक अध्यक्ष ओमबहादुर गुरुङले ९ जनाबाट स्थापना भएको संस्था अहिले बृहत रुपमा अगाडी बढिरहेकोमा खुसी व्यक्त गर्दै अगामी दिनमा राम्चेली एक भएर अघि बढ्नुपर्नेमा जोड दिए । कार्यक्रममा नेपाल पत्रकार महासंघ कास्कीका सचिव भुपाल गुरुङ, अध्ययनरत उत्कृष्ट विद्यार्थीहरु, र इन्डियन आर्मीबाट रिट्यार्ड आर्मीहरुलाई सम्मान गरिएको थियो ।