जोमसोम । मुस्ताङको घरपझोङ गाउँपालिकाले एक हप्ते अध्ययन भ्रमण आयोजना गरेको छ । अन्य स्थानीय तहका असल अभ्यास र विकासका मोडेल अध्ययन भ्रमण आयोजना गरिएको हो । घरपझोङ गाउँपालिका अध्यक्ष मोहनसिंह लालचनले हेटौंडा उपमहानगरपालिका, व्यास नगरपालिका र इलामको रोङ गाउँपालिकासँग छलफल गरी अनुभव आदानप्रदान र असल अभ्यासहरु अवलोकन गरिएको जनाए ।
लालचनले भने, ‘हामीले अन्य स्थानका कार्यसम्पादन, सामाजिक न्याय, शिक्षा, स्वास्थ्य, कृषि, पर्यटन र जैविक विविधताका बारेमा थुप्रै कुरा सिकेका छौं ।’ ३३ जनाको टोलीमा जनप्रतिनिधि, कर्मचारी र पत्रकार थिए ।

पालिका उपाध्यक्ष जमुना थकालीले अन्य पालिकाबाट सिक्न र त्यसलाई लागू गरी समृद्धि हाँसिल गर्न भएको भ्रमण सार्थक बनेको सुनाइन् । प्रमुख प्रशासकीय अधिकृत वेदहरि अधिकारीले भ्रमणले कर्मचारी र जनप्रतिनिधिको कार्य क्षमता विकासमा मद्दत गर्ने विश्वास व्यक्त गरे । टोलीले हेटौंडा उपमहानगरपालिकामा भएका असल अभ्यासबारे पनि जानकारी लिएको थियो ।