पोखरा ।
पोखरामा आयोजित एक कार्यक्रमका सहभागीले सरकारले वातावरण संरक्षणसम्बन्धी अन्तर्राष्ट्रिय सन्धि, महासन्धिहरुमा हस्ताक्षर गरेको पनि कार्यान्वयन नगरेकोमा असन्तुष्टि जनाएका छन् ।

पोखरामा भएको प्रकृति–मानव केन्द्रित जन अभियानको छैटौं राष्ट्रिय सम्मेलनमा बोल्ने वक्ताहरुले सरकारप्रति असन्तुष्टि प्रकट गरेका हुन् । अभियानका पूर्व केन्द्रीय अध्यक्ष उत्तम कँडेलले व्यापक वायु प्रदूषणका कारण दक्षिण एसियाका मानिसहरु ठूलो जोखिममा रहेको जनाए ।

मानव र प्रकृतिको रक्षाका लागि राज्यबाट मात्र भर पर्न सक्ने अवस्था नरहेको बताउदै कँडेलले प्रकृति र मानवको रक्षाका लागि उपयुक्त नीति आवश्यक रहेकोमा जोड दिए ।

अभियानका उपाध्यक्ष राजन केसीले नेपाल जस्ता साना मुलुकले थोरै कार्बन उत्सर्जन गरेको भए पनि ठूला र विकसित देशहरुले गरेको बदमासीको पीडा भोग्नु परेको बताए ।

शनिबारसम्म चल्ने सम्मेलनले नयाँ नेतृत्व चयन गर्ने छ भने वातावरण तथा प्रकृति संरक्षण सम्बन्धमा विविध प्रस्ताव पारित गर्ने अभियानका पूर्वअध्यक्ष सन्तबहादुर घिसिङले जानकारी दिए ।