पोखरा । पोखरा इन्जिनियरिङ कलेज (पेक)मा स्वतन्त्र विद्यार्थी परिषदले नयाँ विद्यार्थीलाई स्वागत गरेको छ । शुक्रबार विशेष कार्यक्रम आयोजना गरी बिइ–सिभिल, बिइ–कम्प्युटर, बिइ–आइटी र बि–आर्किटेक्चरका पहिलो सेमेस्टरमा भर्ना भएका विद्यार्थीलाई स्वागत गरेको हो ।

कार्यक्रममा कलेजका प्रिन्सिपल सोम गुरुङले कलेजले ज्ञान, अनुभव र नेतृत्व विकासका लागि पर्याप्त अवसर उपलब्ध गराएको जनाए । उनले विद्यार्थीलाई सहकार्य, मेहनत र इच्छाशक्तिका साथ भविष्य निर्माण गर्न प्रेरित गरिने उल्लेख गरे ।
कलेजका निर्देशक अम्बर गुरुङले इन्जिनियरिङ सिर्जनशीलता र समस्या समाधानको कला भएको बताउँदै विद्यार्थीले समाज र राष्ट्रलाई सकारात्मक परिवर्तन गर्न महत्वपूर्ण भूमिका खेल्ने विश्वास व्यक्त गरे । क्याम्पसका प्रशासन प्रमुख चिजकाजी गुरुङले राजनीति र अध्ययनको सन्तुलनमा ध्यान दिन आग्रह गर्दै पढाइमा असर गर्ने क्रियाकलापले विद्यार्थी र संस्थालाई नोक्सान पुर्‍याउने उल्लेख गरे ।
कलेजका पूर्व विद्यार्थी तथा पोखरा विश्वविद्यालयका सहायक प्राध्यापक डा उदयराज ढुंगानाले शैक्षिक प्रमाणपत्र मात्र होइन, अनुशासन र नैतिकता पनि जीवनमा सफल हुन महत्वपूर्ण रहेको धारणा राखे। । स्वतन्त्र विद्यार्थी परिषदका कार्यवाहक सभापति गौरव गिरीको अध्यक्षतामा भएको कार्यक्रममा मिलान डुम्रेले पनि बोलेका थिए ।