पोखरा । सूर्य तारा युवा क्लबको आयोजनामा दोस्रो सूर्य तारा खेलकुद महोत्सव २०८१ हुने भएको छ । लेखनाथलाई खेलकुद केन्द्रको रुपमा अघि बढाउन आयोजित महोत्सवमामा पुरूष फुटबलसहित विभिन्न ७ खेल हुने मंगलबार पोखरामा पत्रकार सम्मेलन गरी जानकारी दिइएको हो ।

पोखरा २९ लेखनाथमा हुने महोत्सव फागुन २४ गते देखि चैत २ गते हुने क्लबका अध्यक्ष एवं कार्यक्रम संयोजक विष्णु पुनले जानकारी दिए । महोत्सव उद्घाटन प्रतिनिधिसभाका सभामुख देवराज घिमिरेले गर्ने छन् । समापन सञ्चार तथा सूचना प्रविधि मन्त्री पृथ्वी सुब्बा गुरूङले गर्ने उनले बताए ।

प्रतियोगितामा सुर्य तारा नेकोस कप फुटबल, खुला सामूहिक लोक नृत्य प्रतियोगिता, खुला महिला स्लो स्कुटर रेस, राष्ट्रिय महिला डोरीतान प्रतियोगिता, खुला टेबल टेनिस प्रतियोगिता र एथलेटिक्सका प्रतिस्पर्धा हुने छन् । विभिन्न जातिय संघ, संस्थास्तरीय झाँकी प्रदर्शनी प्रतियोगितासमेत समावेश गरिनेछ ।

नेकोस फुटबलतर्फ १२ टिमको सहभागिता हुने आयोजकले जनाएको छ । प्रतियोगितामा विजेता हुने टिमले नगद ४ लाख ४ हजार ४ सय ४४ का साथ ट्रफी, मेडल तथा प्रमाणत्र प्राप्त गर्नेछ भने उपविजेताले नगद २ लाख २ हजार २ सय २२ रुपैयाँ प्राप्त गर्ने आयोजकले जनाएको छ ।

प्रतियोगिता अन्तर्गत हुने हरेक प्रतिस्पर्धामा आकर्षक नगद पुरस्कारका साथमा ट्रफी र मेडल तथा प्रमाणपत्र प्रदान गरिनेछ । महोत्सव अवधिभर १५ लाख दर्शकले अवलोकन गर्ने लक्ष्य रहेको महोत्सव गर्न करिब ८१ लाख खर्च हुने अध्यक्ष पुनले बताए । फुटबल खेल हेर्नका लागि पहिलो चरणमा नगद १ सय र सेमीफाइनल र फाइनलको टिकट २ सय तोकिएको छ ।