पोखरा ।
प्रथम पोखरा कप राष्ट्रिय पुरुष ह्यान्डबल प्रतियोगितामा लिग चरणका खेल सकिएका छन् । गण्डकी प्रदेश ह्यान्डबल संघको आयोजना तथा प्रदेश खेलकुद परिषद गण्डकीको प्रवद्र्धन तथा कास्की जिल्ला ह्यान्डबल संघको प्राविधिक सहयोगमा जारी राष्ट्रिय ह्यान्डबल प्रतियोगिताको दोस्रो दिन लिग चरणका खेल सकिएका हुन् ।

सोमबार भएको समूह ‘बी’ तर्फको भएको विभागीय डर्बीमा त्रिभुवन आर्मीले जित हाँसिल गरेको छ । आर्मीले अर्को विभागीय टोली एपिएफलाई १९–१४ को अन्तरले पाखा लगायो । आर्मीको जितमा आकाश अधिकारीले सर्वाधिक ५ गोल गरे । समूह ‘ए’तर्फ कोशी र कर्णाली प्रदेशले एक–एक अंक बाडेका छन् । खेल २०–२० गोलको बराबरीमा रोकिएपछि उनीहरुले अंक बाडेका हुन् ।

समूह ‘बि’ तर्फ आर्मीले लुम्बिनीलाई ३७–२१ ले हराउँदै ६ अंकका साथ शीर्षस्थानमा रहँदै सेमीफाइनलमा प्रवेश गरेको छ । आर्मीका सुरेश महतोले सर्वाधिक ९ गोल गरे । सो समूहबाट एपिएफ उपविजेता बन्दै सेमीफाइनलमा प्रवेश गरेको छ । एपिएफले आइतबार लुम्बिनी प्रदेशलाई हराएको थियो । एपिएफको ३ अंक रहँदा लुम्बनी अंकविहीन हुँदै बाहिरियो ।

समूह ‘ए’ तर्फकै अर्को खेलमा कर्णालीले सुदुर पश्चिमलाई ३७–२७ गोलले हरायो । कर्णालीको जितमा महेश थापाले ११ गोल गरे । समूह ‘ए’ बाट गण्डकी शीर्षस्थानमा रहँदै सेमीफाइनलमा प्रवेश गरेको छ । लिग चरणको अन्तिम खेलमा गण्डकीले कोशीलाई ३७–२५ ले हराए पनि कोशीले सेमीफाइनलमा स्थान बनाएको छ ।

३ खेल खेलेको गण्डकीको विजेता बन्दै कुल ९ अंक रह्यो । सोही समूहबाट कोशी र कर्णालीको समान चार/चार अंक रहे पनि गोलअन्तरको आधारमा कोशी अन्तिम चारमा प्रवेश गरेको हो । कोशीले कर्णाली भन्दा ३ गोल कम खाएको थियो ।

अब सेमीफाइनलमा घरेलु टोली गण्डकीले एपिएफको सामना गर्ने छ भने आर्मीले कोशीको । प्रतियोगिताको उपाधि भिडन्तसमेत मंगलबार नै हुनेछ । प्रतियोगितामा आयोजक गण्डकीसहित कोशी प्रदेश, लुम्बिनी प्रदेश, कर्णाली प्रदेश, सुदूरु पश्चिम प्रदेश र दुई विभागीय टोलीे त्रिभुवन आर्मी क्लब र एपिएफ क्लबको सहभागिता छ ।

प्रतियोगिताको उपाधि विजेता टिमले नगद १ लाख, उपविजेताले नगद ५० हजार र तेस्रो हुने टिमले नगद ३० हजारका साथमा ट्रफी, मेडल तथा प्रमाणपत्र प्राप्त गर्ने छन् । उत्कृष्ट गोलरक्षक, उत्कृष्ट खेलाडी र सर्वाधिक गोलकर्तालाई जनही नगद ५ हजारका साथमा ट्रफी तथा प्रमाणपत्र प्रदान गरिनेछ ।