पोखरा । पोखरामा ‘राष्ट्रिय ८ ए साइड भेट्रान्स फुटबल’ प्रतियोगिता हुने भएको छ । अमरसिंह ब्वाइज (एबिसी) को आयोजनामा ४५ वर्षमाथिको भेट्रान्स फुलबल प्रतियोगिता हुन लागेको हो ।

चैत २७ गतेदेखि पोखरा रंगशालाको बि खेल मैदानमा हुने तेस्रो संस्करणको फुटबल प्रतियोगितामा देशभरबाट १४ टिमले सहभागी जनाउने आयोजकले शनिबार पत्रकार सम्मेलनमार्फत जानकारी दिएको छ ।

प्रतियोगितामा ढोलाहिटी काठमाडौं, हेटौडा, बुटवल, चितवन, सिमरा, वीरगञ्ज ,रवि काठमाडौ, प्रदीप, अजब काठमाडौं, संगम, बगर भाइखलक, वारियर र आयोजक एबिसी सहित १२ टिमले सहभागिता जनाउने पक्का भएको क्लब अध्यक्ष राजेश गुरुङले जानकारी दिए ।

प्रतियोगितामा प्रथम हुने टिमले १ लाख ५५ हजार ५ सय ५५, द्वितीय हुने टिमले ७७ हजार ७ सय ७७ नगद र मेडल, ट्रफी र प्रमाण–पत्र पाउने छन् । प्रतियोगितामा सर्वोत्कृष्ट खेलाडीलाई १० हजार नगदसहित पुरस्कृत गरिनेछ । चैत ३० गतेसम्म चल्ने प्रतियोगिता गर्न १४ लाख खर्च हुने अनुमान गरिएको प्रतियोगिताका सुरक्षा संयोजक दीपक थापाले बताए ।