पोखरा ।
लायन्स अन्तर्राष्ट्रिय डिष्ट्रिक्ट ३२५ एम नेपालले पोखरामा अन्तर्राष्ट्रिय भलिबल प्रतियोगिताको आयोजना गर्ने भएको छ । प्रतियोगिता आगामी बैशाख १८ देखि २२ गतेसम्म पोखरा रंगशालामा सञ्चालन हुनेछ ।

प्रतियोगितामा विदेशीसहित कुल ६ टिमको सहभागिता रहने डिष्ट्रिक्ट गर्भनर लायन चण्डीप्रसाद अर्यालले जानकारी दिए ।
गण्डकी प्रदेश भलिबल संघ, त्रिभुवन आर्मी क्लब, नेपाल पुलिस क्लब, एपिएफ क्लब, र पाकिस्तान भलिबल क्लब इस्लामावादको सहभागिता रहने बताउदै इरान र भारतको टिमको सहभागिता रहने छ । नेपाल र पाकिस्तान गरी ५ वटा टिमको फाइनल भइसकेको उनले बताए ।

प्रतियोगिताको विजेता टोलीले ४ लाख ४४ हजार ४ सय ४४ रुपैयाँ, उपविजेताले २ लाख ४४ हजार ४ सय ४४ रुपैयाँ, सान्त्वना हुने समूहले १ लाख ४४ हजार ४ सय ४४ रुपैयाँ र शिल्ड, मेडल तथा ट्रफी प्राप्त गर्नेछन् ।

प्रतियोगिताको लिगचरणका खेलका लागि प्रवेश शुल्क ३ सय रुपैयाँ निर्धारण गरिएको आयोजकले जनाएको छ ।