पोखरा । पोखरामा जारी दोस्रो केपी ओली कप टी २० राष्ट्रिय पुरुष क्रिकेट प्रतियोगिताको समूह ‘बि’बाट गण्डकी हिरोज रनरेटको आधारमा सेमीफाइनलमा प्रवेश गरेको छ । मदन भण्डारी स्पोट्र्स एकेडेमीको आयोजनामा पोखरा रंगशाला स्थित क्रिकेट मैदानमा जारी प्रतियोगिताको छैटौं दिन समूह ‘बि’ तर्फका अन्तिम खेल हुने भनिए पनि बुधबार रातिको वर्षासँगै बिहीबारको प्रतिकूल मौसमले खेल हुन नसकेपछि रनरेटको आधारमा हिमालयन क्रिकेट एकेडेमीलाई पछि पार्दै गण्डकी हिरोज शीर्षस्थानमा रह्यो ।

२ खेल खेलेको गण्डकीको २ जितसहित ५ अंक रहँदा समान खेल खेलेको हिमालयनको पनि समान अंक थियो । उता ग्रेट हिमालयन क्रिकेट एकेडेमी र चितवन क्रिकेट क्लबको पनि कुल २ खेलबाट समान १÷१ अंक थियो । बिहीबार समूह चरणमा आफ्नो अन्तिम खेल अन्तर्गत चितवन र ग्रेट हिमालयबिच पहिलो तथा गण्डकी र हिमालयन बिचमा दोस्रो खेल हुने तालिका थियो ।

दुवै खेल मौसमका कारण रोकिएपछि नेट रनरेटका आधारमा गण्डकी शीर्ष स्थानमा रहँदै अन्तिम चारमा पुग्ने दोस्रो टोली बने । गण्डकीको रनरेट १.४३४६ रहँदा हिमालयनको ०.८१५८ रह्यो । ग्रेट हिमालय माइनस २.११२८ अंकका साथ तेस्रो स्थानमा रहँदा माइनस ३.४७२५ अंकका साथ चितवन पुछारमा रह्यो ।

समूह ‘ए’बाट यसअघि शीर्षस्थानमा रहँदै सिइसी काठमाडौं सेमीफाइनलमा प्रवेश गरेको थियो । काठमाडौंले आफ्नो ३ मध्ये ३ खेलमा नै जित हासिल गर्दै ६ अंकका साथ शीर्ष स्थानमा छ । १६ टिमको सहभागिता रहेको प्रतियोगितामा ४ समूह छन् । अब समूह ‘सी’ र ‘डी’ तर्फका खेल हुन बाँकी छ । हरेक समूहको शीर्ष स्थानमा रहने टोलीले अन्तिम चारमा प्रवेश गर्ने छन् ।

चैत २३ गतेबाट सुरु भएको प्रतियोगिता बैशाख ५ गतेसम्म सञ्चालन हुनेछ । प्रतियोगितामा उपाधि विजेता टिमले नगद १० लाख र उपविजेताले नगद ५ लाखका साथमा ट्रफी, मेडल तथा प्रमाणपत्र प्राप्त गर्ने छन् ।

‘प्लेयर अफ द सिरिज’ ले ३० हजार, वेष्ट बलर, बेष्ट ब्याटरले जनही १० हजार र ‘प्लेयर अफ द म्याच’ले ५ हजारका साथमा ट्रफी प्राप्त गर्ने छन् । प्रतियोगितामा शुक्रबार समूह ‘सी’तर्फ कर्णाली एकेडेमी र मधेस प्रदेश क्रिकेट क्लबबिच पहिलो तथा हिमाल फे्रन्डस क्रिकेट क्लब र लुम्बिनी खुकुरीबिच दोस्रो खेल तय छन् ।