पोखरा ।
पोखराको बाटुलेचौरदेखि जोगीमणिको तुम्केसम्म नयाँ वर्षको दिन शुभकामना दौड हुने भएको छ । हिमालय क्लब र नमुना क्लबको आयोजनामा वैशाख १ गते नयाँ वर्षको स्वागत स्वरुप प्रतियोगिता हुन लागेको हो ।

दौडमा ५० वर्ष माथिका पुरुष र ४९ वर्ष मुनिका महिला तथा पुरुषले सहभागिता जनाउने हिमालय क्लवका अध्यक्ष मोहन थापाले जानकारी दिए । मैदानबाट बिहान सुरु हुने दौड नमुना खेल मैदान तुम्के पुगेर सकिनेछ ।

दुवै विधामा प्रथम, द्वितीय, तृतीय र सान्त्वना हुनेलाई क्रमशः नगद ५ हजार, ३ हजार, १ हजार र सान्त्वना पुरस्कार प्रदान गरिने अध्यक्ष थापाले बताए । कार्यक्रममा वडा नं. १६ र १९ का बासिन्दाले सहभागिता जनाउन सक्ने क्लबले जनाएको छ ।